Iaduwen Omw Pahn Wiahiong Ehu Ehu Rahn en Katapan

“KASALEHIONG kiht iaduwen atail pahn wiahiong atail rahn akan en mih ni ahl ehu en erpit.” (Melkahka 90:12, NW) Met wia kapakap karakarahk ehu me Moses ntingihedi. Dahme e wie pekipek wasaht? Kitail en pil kin wia soangen pekipek wet te?

Nan Melkahka 90:10, Moses kin lemeleme duwen mwotomwot en mour en aramas. Ni ehu ahnsou, e ntingihedi kadehdepen irair en Sohp me mahsanih: “Kitail koaros ipwidi luwet. Aramas koaros ahneki soangen mourteieu me mwotomwot oh diren apwal.” (Sohp 14:1) E sansal mwahu me Moses nantiong pohnese me mour en aramas soh unsek me mwotomwot. Kahrehda, e kin medewehki me ehu ehu rahn en mour wia kisakis kesempwal ieu. Ni Moses ah wia ah pekipek ong Koht, e kasalehda ah ineng mourki luhwen ah mour akan ni elen erpit, ni ahl ehu me pahn kaperenda ah Sounkapikada. Kitail soh men rapahki kitail en doadoahngki atail rahn akan ni ahl me katapan? Met pahn wia atail mehn akadei ma kitail men Koht en ketin kupwurkin kitail nan ahnsouwet.

Pil mie ehu kahrepe tohrohr me pahn kamwekid kapehden Moses oh Sohp, oh kahrepe ieu me pahn pil kamwekid kapehdatail kan. Sapwellimen Koht ohl riemen pwukat kin kaskasik kating kan me pahn kohdo​—mour nan sampah pahn irair kan me mwahu sang ahnsouwet. (Sohp 14:14, 15; Ipru 11:26) Ni ahnsowo, sohte doadoahk mwahu ieu pahn ohla ki mehla. Sounkapikpatail koasonehdi me irail akan me lelepek pahn mour kohkohlahte nan paradais ehu nan sampah. (Aiseia 65:21-​24; Kaudiahl 21:3, 4) Met pahn kak pil wia omw pai ma ke wiahiong omw rahn akan en kesempwal ni ahl ehu me pahn kak wiahkihda mohngiong erpit ehu.’