Irail Kin Ehukihong Rongamwahu Rehn me Salengepon kan
“IRAIL wahdohng kumwail kakehlepen pali ngehn!” Iei met mwomwen kawehwe me ohlo me kin kakaun wasahn apwalih aramas mah kan nan Navalcarnero, Madrid, Spain koasoiahki ahn Sounkadehdehn Siohwa kan ar leledohng wasao. Dahme kahrehda e ndahki mwo?
Irail me tohto nanpwungen aramas oko nan Rosas del Camino Center irail sohte kak rong wasa. Ahpw, pwehki Sounkadehdehn Siohwa kan kin nannanti pwe ren koledi Sign Language (lokaiahki peh kan) ni lokaiahn Spain, irail kak koasoiong tohn wasao. Ohlo me kin kakaun wasao eri kapingahki Sounkadehde kan arail kin toukihda arail ahnsou en padahkihong tohn wasao duwen kaweid en pali ngehn me kesempwal. E tehkada duwen wekidekla mwahu tohto me padahk en Rongamwahu en Wehio wiahiong tohn imwen aramas mah wet. Oh pil, towe kan—ahpw mehlel irail me sohte kak rong oh kilang wasa kan—inenen paiekihda mwemweit en Sounkadehde kan.
Emen tohn wasao me maskun oh salengepon me ede Eulogio ahnsou wet tepida onop Paipel rehn Sounkadehde kan. Ehu rahn, ahnsou me e wie onohnop, ohl mah men kohdo oh kihong Sounkadehdeho “poem” pwoat me tohn imwen aramas maho wiahda pwehki arail perenki oh kapingki dahme Sounkadehde kan kin wiahiong irail. Oaralap en “poem” pwoatet koasoia “En Wia Sounkadehde.” Ekis wasao koasoia: “Irail mourki mour mwahu oh kaiahnda mwahu, oh irail ale erpit kansenamwahu sang rehn Siohwa. Irail kin pwurepwure ihmw akan pwehki irail kin likih Siohwa.”
Ni mehlel, likih Siohwa me kahrehiong Sounkadehde tohto nan sampah pwon en sukuhliki “sign language” (lokaiahki peh) pwehn sewese aramas salengepon kan nan sapwarail. Ni ahl wet, irail pahn kak ehukihong irail pwukat mahsen en kangoang me pid koapworopwor me ntingdi nan Paipel.