Wiahiong Madamadau Loal en Kansenamwahu

ONG ekei aramas, en kin doudouloale kin wia mehkot apwal. Re kin medewe me en wia met pahn anahne ren kin madamadau laud. Soangen aramas pwukat pil kin ahneki pepehm suwed ni ar sohte kin wia met. (Pilipai 4:8) Ahpw, ni atail kin medemedewe padahk mehlel kan me kitail sukuhlkier me pid duwen Siohwa, sapwellime irair kaselel kan, soahng kan me e ketin wiahdahr, sapwellime kosonned kan, oh pil sapwellime kupwur kaselel kan kak oh e pahn pil wia ahnsou kansenamwahu ehu. Pwekida?

Siohwa Koht iei Kaunepen lahng oh sampah oh e kin ketin doadoahk ahnsou koaros pwehn kapwaiada sapwellime kupwur kan. (Sohn 5:17) Mendahki eh kin ketin kedirepw, e kin ketin nsenohki madamadau en emenemen sapwellime tohnkaudok kan. Sounmelkahka Depit ese duwen met ihme kahrehda e mahsanih: “Maing Kaun, komw ketin kasawih ie, eri, komw ketin mwahngih ie. Komw ketin mwahngih mehkoaros me I kin wia; sang wasa doh, komw ketin mwahngih ei lamalam akan koaros.”—Melkahka 139:1, 2.

Mwein mie me pahn nsensuwedkihla audepen melkahka pwoatet. Ele e pahn medewe, ‘Mendahki Koht ketiket “wasa doh,” e ketin mwahngih madamadau suwed koaros me kin pwarada nan ei lamalam.’ Me mwahu ong kitail en ahneki soangen madamadau duwehte met. Met kak sewese kitail en pelianda madamadau sapwung kan oh ni ahnsou me kitail ahneki soangen madamadau pwukat, a kitail en wehkohng Koht. Kitail en kamehlele me e pahn ketin mahkohng kitail pwehki atail pwoson meirong tomw en Sises. (1 Sohn 1:8, 9; 2:1, 2) Kitail en pil tamataman me Siohwa kin ketin kasawih sapwellime tohnkaudok kan ni ahl me pahn wia kamwahu ehu ong irail. E kin ketin tetehk kitail ni ahnsou me kitail kin medemedewe duwen atail kalahngan ong ih.

Ele ke pahn idek, “Ia duwe, Siohwa pahn kak ketin tetehk madamadau koaros en sapwellime tohnkaudok meh rar rar kei?” Ei, e kin ketin wia met. Sises ketin kasalehda sapwellimen Siohwa pepehm ong kitail ni eh mahsanih me Siohwa kin ketin nsenohki kisin menpihr kan, oh e pil mahsanih: “Kumwail inenen kesempwalsang menpihr tohto!” (Luk 12:6-8) Menpihr kan sohte kin medewe duwen Siohwa. Eri ma iei Siohwa kin ketin kesempwalki irail, a ia uwen laud en eh pahn kin ketin kesempwalkin kitail oh kupwurperenki atail kin medemedewe duwen ih! Kitail en pil kin duwehte Depit me kin kapakap ni koapworopwor: “Maing KAUN, . . . komw ketin kupwurehla ei pato oh ei lamalam!”—Melkahka 19:14.

Pil ekei mehn kadehde me kasalehda me Siohwa kin ketin nsenohki mehlel madamadau en sapwellime tohnkaudok lelepek kan kin dierek nan kokohp en Malakai. E koasoia duwen atail ahnsou: “Eri, aramas akan me kin lemmwiki Koht ahpw koasoakoasoiapene nanpwungarail, oh KAUN-O ketin karonge oh kupwure duwen me re koasoia. Mwohn silangi, e ntingdier nan pwuhk ehu duwen irail kan me lemmwiki oh wauneki KAUN-O.” (Malakai 3:16) En kin katamankin kitail me Siohwa kin ketin “karonge oh kupwure” ahnsou me kitail kin medemedewe duwen ih pahn kak kahrehda doudouloale soahng kan me pid duwen Koht pahn kin wia ahnsou kansenamwahu ehu. Ihme kahrehda kitail en pwungki dahme sounmelkahka menet ntingihdi. E mahsanih: “I pahn medemedewe duwen mehkoaros me komw ketin wiadahr; I pahn medemedewe duwen sapwellimomwi wiewia manaman akan.”—Melkahka 77:12.