Pwung en Ale Ede

ARAMAS koaros ahneki pwung en ale adarail. Nan sapwen Tahiti, seri men me ipwidi oh sohte me ese ihs ah pahpa oh nohno pil kin kohieng ede. Ohpis en kileledi pahn kihong eden seri sepwoupwouo oh pil ah last name.

Ahpw, mie emen me mwomwen kohsang ih pwung wet me kohieng aramas teikan koaros. Kapwuriamwei pwe menet iei ih “me iei tapwin peneinei koaros me mih nanleng oh sampah”! (Episos 3:14, 15) Kilang, aramas tohto kahng doadoahngki mwaren Sounkapikadao me kileldi nan Paipel. Irail mwahuki weliankihdi mwareo daidel kan me duwehte “Koht,” “Kauno,” de “Ih me Poatopoat.” Ahpw, ia uhdahn mware? Sounmelkahkao sapeng peidek wet: “Re en esehla me komwihte me Siohwa, Kaun Lapalap en mehkoaros nin sampah.”—Melkahka 83:18

Ni tepin senturi 19, ahnsou me misineri kan en London Missionary Society peidi nan sapwen Tahiti, irail aramas en Polynesia pwukat kin kaudokiong soangen koht tohto. Emenemen koht pwukat kin mie mwarerail, oh koht kan me keieu kesempwal rehrail iei Oro oh Taaroa. Pwehn kasalehda wekpeseng en Koht en Paipel sang koht pwukat, irail misineri kan kin doadoahngki laud mwahr sarawio me kileldi ni lokaiahn Tahiti, Iehova.

Mwahr wet ndandla oh aramas akan kin kalapw doadoahngki nan arail koasoi oh nting kan. Nanmwarki Pomare Keriau en Tahiti, me kin kakaun ni tepin senturi 19, kin kalapw doadoahngki mwaren Koht nan sapwellime kisinlikou kan. Kamehlelepen met kin pwarada nan sapwellime kisinlikou kan me kin ntingdi ni lokaiahn wai. Kisinlikou pwutak kin mihmi nan wasahn nekidala dipwisou en mahs me adaneki Museum of Tahiti and Its Islands, oh e sansal wasaht. Met kin kasalehda me aramas ako kin pwungki oh doadoahngki mwar sarawi wet. Oh pil, mwaren Koht kin sansalda pak kid kei nan tepin Paipel me kawehwehdi ni lokaiahn Tahiti, me kawehwehpe unsekla nan pahr 1835.

[Kawehwehpen kilel kan nan ehu ehu pali 32]

Nanmwarki Pomare Keriau

[Kilel Credit Line nan Pali 32]

Nanmwarki oh sapwellime kisinlikou: Collection du Musée de Tahiti et de ses Îles, Punaauia, Tahiti