En Lel Mohngiong en Seri men

MIE PAK ke nsensuwedkihla ahmw kin kilang seri men kin wie mwadomwadongki mehn mwadong en mahwen kan? Soangen mwadong wet kin rekla rehn irail pwulopwul kan pwehki tiahk lemei inenen rekla ni mehn kamweit kan. Iaduwen ahmw kak sewese emen seri oh kihsang mehn mwadong en mahwen kan sang ih oh kihong mehn mwadong en meleilei kan? Waltraud, emen misineri werei nan Africa wia met.

Pwehki mahwen, Waltraud anahne kohkohsang wasa e kin mihmi ie oh kohla nan ehu sahpw en Africa. Wasao, e tepida onop Paipel rehn emen lih me naineki pwutak sounpar limau men. Ahnsou koaros me e kin kohla rehn liho, pwutako kin wie mwadomwadongki kisin kesik pilastik ehu pwe ihte nah mehn mwadong. Waltraud saikinte kilang serio kauhlahng emen kesiko, ahpw serio kin kalapw kedirepwki kihpeseng oh pil pwurehng kihpene kesiko, mwomwen me e kin wie audaude kesiko.

Waltraud eri ndaiong pwutako: “Werner, ke ese dahme kahrehda I kohkihdo nan ahmw wasa? Pwehki mahwen—ihme I anahne tangasang irail aramas keper kan me kin doadoahngki kesik kan me duwehte noumwen oh kasikihdi aramas akan. Ke lemeleme soangen kesik kan mwahu?”

“Soh, e sohte mwahu,” Werner nsensuwedla oh sapeng.

Waltraud nda, “Ei, ke pwung.” Ih eri idek reh: “Ke ese dahme kahrehda I kin mwemweitdo rehn kowe oh ahmw nohno wihk koaros? Pwehki Sounkadehdehn Siohwa kan mwahuki sewese meteikan en ahneki meleilei rehn Koht oh mehn mparail kan.” Waltraud ale mweimwei sang en Werner nohno, ih eri ndaiong Werner: “Ma ke pahn kihdo noumw kesiken, ngehi kesehla, I kak kihwei noumw mehn mwadong sidohsa.”

Werner kihong ih nah kesiko. E awiawih wihk pahieu, ih eri alehdi mehn mwadong kapwo—sidohsa ehu me wiawihdahsang tuhke oh Werner sirei laud ni eh ale met.

Ke kin wiahda ahnsou en lokaia ohng noumw seri kan oh song en lel mohngiongarail kan pwe irail en kak mwekidki oh kesehla neirail mehn mwadong en dipwisou en mahwen kan? Ma ehi, eri ke kin padahkiong irail mehn kasukuhl ehu me pahn mwahu ong arail mour.