Kesempwalpen Wia “Dahl Takai Luwet”

WAHNPOARON Piter ntingihdi: “Kumwail ohl pwopwoud kan, ni amwail pahn kin werekiong amwail pwoud kan, kumwail uhdahn pahn wauneki irail oh pohnese me irail kin duwehte dahl takai luwet.” (1 Piter 3:7, NW) Ni ahnsou me Paipel kahdaneki lih “dahl takai luwet,” met kin kamwamwahlihala lih akan? Kitail kilang dahme sounnting mahsen sarawio men kawehwehda sangete nin tapio.

Lepin lokaiahn Krihk me kawehwehda “wauneki” kin wehwehki “kesempwalki.” Kahrehda, ohl pwopwoud Kristian emen en kanaiehng ah pwoud lih, kasalehiong dahme konehng ni madamadau duwehte dahl kehpwal oh kesempwal. Mahsen pwukat sohte kin kamwamwahlihala ih. Karasepe ehu, tehk duwen lamp ieu me ede Tiffany lotus lamp. Lamp wet kin inenen kehpwal. Iaduwen, met wehwehki me lamp wet solahr nohn kesempwal pwehki e kehpwal? Uhdahn soh! Nan pahr 1997, tepin Tiffany lotus lamp me wiawihda netila ni uwen tala million 2.8! Pwehki ah kehpwal, met kahrehda eh pweilaudla, kaidehn pweitikitik.

Pil duwehte, wauneki lih men oh wiahki dahl kehpwal sohte kin katikala kesempwalpe. Ohl pwopwoud men en kin kousoan rehn ah pwoud lih ni “wehwehki” kin wehwehki me ohl pwopwoud anahne tamataman dahme ah pwoud lih kak wia oh sohte kak wia, dahme e mwahuki oh sohte mwahuki, oh pil ah pepehm akan. Ohl nsenoh men kin kak kasawihada oh wauneki wekpeseng kan nanpwungen ih oh ah pwoud lih. E kin kasalehda kadek lamalam ohng liho “pwe en dehr mie mehkot me pahn kerempwa [ah] kapakap akan.” (1 Piter 3:7) Ohl pwopwoud emen me sohte kin wauneki ahn ah pwoud lih ah irair akan kin kak kauwehla ah nanpwung mwahu rehn Koht. Eri, e sansal me Mahsen en Koht sohte kin mwamwahleki lih kan. Ahpw, e kin kesempwaliki oh wauneki irail.