Kasdo—Mehn Epwel Seri Mwahu?
EKEI PAK, en kamweitih seri kan sang ni ahmw pahn kihong irail en kilang kasdo nan TV pwe ke en kak wia ahmw kedirepw teikan kin mwomwen mwahu. Ahpw, iaduwen met kin kamwekid lamalam en seri kan?
The New York Times ripohtki me “seri pwelel kan pil kin mwekidki soangen mehn kasukuhl en pepehm kan me kin kohsang nan kasdo.” Nan ehu roporop me wiawi ni ahnsou keren, emen lih kin kohda nan kasdo oh e kin kasalehda soangen pepehm tohto ohng mehn mwadong ehu. Times kasalehda me “ni liho kin mwomwehda me e masakada mehn mwadongo, irail seri pwelel ko kin kahngala mwadongki met oh seri kan kin mwomwen saloh oh pil pwunod, mwehl oh kin sengiseng. Ah ni liho kin kasalehda me e kin perenkihda mehn mwadongo, seri ko kin men mwadongki mehn mwadongo.”
Sansal me kasdo kin kak kamwekid pepehm en seri pwelel kan. A iaduwen met kak kamwekid seri kan ahnsou reirei? Dr. Naoki Kataoka, emen sounpadahk en toahktehn seri kan ni Kawasaki ni Medical College nan Kurashiki, Japan, kin tetehk seri kei me kin inenen nennen oh sohte kin kasalehda arail pepehm kan pohn meserail. Irail koaros kin kilang kasdo erein ahnsou reirei. Emen pwutak me sounpar riau sohte kak koasoakoasoi oh malaulau lokaia me e ese. E kin kilang kasdo sang ni menseng lel ni soutik rahn koaros sangete ni ahnsou me e sounpar ehu. Ahnsou me ah nohno alehda kaweid en toahkte oh kauhdi serio sang kilang kasdo oh ah nohno kin uhd kihong ah ahnsou ohng nah pwutako oh kin iang ih mwadong, ih ahnsou me e ekis esehla lokaia. Ehi, pahpa oh nohno kan anahne ehuiong neirail seri kan.
Siohwa Koht, me wiahda koasoandi en peneinei kan, kasalehda kesempwalpen ehuiong seri kan. Sangete mahs, e mahsanih ong sapwellime aramas akan: “Padahkihong noumwail seri kan [Mahsen en Koht]. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmihseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” (Deuderonomi 6:7) Pahpa oh nohno kan, kaidehn kasdo, me kak kaweid seri kan ni ahl me keieu mwahu ki lokaia de mehn kahlemeng kan ohng “iaduwen arail pahn momour.”—Lepin Padahk 22:6.