Likeilapala Ahpw Sohte Kelikilikidi

LIKEILAPALA ah kin lelohng aramas, irail me tohto kin sohla­kak­seli, oh sohla kin patehng meteikan. Met kaidehn ihme wiawihong Fernand Rivarol, me mehla ni a sounpar 95 nan Geneva, Switzerland. E kin kousoan kelepw, pwe ah werek mehsang ih oh nah serepeino pwopwoudla oh mie pein imwe. Mendahte ma pali lauden ah ahnsou e kin mihmihte ni imweo, e sohte kin sangat. E kin kalap mwomwohd ni ah tehpel nan ah perehn koasoakoasoi, oh nah telephone kin mih nan peh, oh e kin telephone ong aramas akan oh koasoakoasoiaiong irail duwen mehkan me pid pali ngehn.

Ni erein ah mour kaperen, mie ahnsou ehu me Fernand sohla­kak­seli. Pwekihda? Ahnsowo me Fernand oh ah pwoud inenen ngiangi nan ara doadoahk en wia Sounkadehdehn Siohwa nan pahr 1939, Mahwin Keriau en sampah tepiada wiawi nan Iurop. Fernand kolokolete a pilipil me sang nan Paipel en dehr kemehla aramas. Pwehki pilipil wet, e kahrehiong en sohla a doadoahk en mwohni oh selidi pak kei​​—patpene wiahda sounpar limau elep​​—oh erein ahnsou ko e tohrohr sang ah pwoud oh nah kisin serepeino.

Ni Fernand eh pwurehng tamanda e nda: “Ong aramas ngeder, e mwomwen me I kesehla ahi doadoahk en mwohni mwahu oh kihong ahi peneinei nan irair me sohte sawasparail. Aramas akan kin kailongkin ie oh wiahkin ie aramas mwersuwed. Ahpw ni ahi kin katamando pahr apwal pwukat, I kin tamanda mwahu duwen Siohwa ah kin ketin utung ie oh sewese ie. Pahr tohto dower powe, ahpw ahi likih Siohwa kin kehlailte duwehte mahs.”

Pwoson wet kin kahrehiong Fernand en kin doadoahngki telephone oh kin ehukihong meteikan ah koapworopwor me poahsoankihda Paipel. Ma aramas emen kin kasalehda me e men rong, e kin kadaralahng aramaso sawasepen Paipel kan. Mwurin met, e kin telephonelahng aramaso oh pwurehng kilang ma aramaso kin perenki audepen pwuhk ko. Ekei pak aramas ako kin kadarodohng ih kisinlikou oh kasalehda arail perenki audepen pwuhk ko, oh met kin inenen kapereniong ih.

Mwein ele ke kin tuhwong aramas me duwehte Fernand nan omw wasahn kousoan. Ke sou rong mahs dahme e pahn nda pwe ken diarada dahme e kamehlele? Sounkadehdehn Siohwa kan kin ahnsou koaros perenki ehukihong uhk dahme re pwoson.