“Pwehki Pwutak Sounpar Duwau Men”

SOHTE LIPILIPIL ahnsou kan me Sounkadehdehn Siohwa kan kin pwarala ni ah wenihmw, Wiesława, me kin mih palieir en Poland, kin kalahngankihong irail arail kin pwaredo reh oh ni kadek padahkiong irail en kohkohla. Ehu rahn, Samuel me mahki sounpar duwau iang eh nohno kohla ni imweo. Ahnsowo, Wiesława medewehda en rong ara padahk oh alehda makasihn ehu me koasoia duwen paradais pohn sampah.

Pwehki e kerenlahngehr rahn en Katamanpen Kamatalahn Sises Krais, Samuel men luke Wiesława en iang towehda rahn tohrohr wet. Eri kisin pwutak menet iang eh nohno oh pwurala rehn Wiesława oh wah doaropwehn luhk. Ni Wiesława kilang me pwutak menet likouda mwahu, e pwurolongala oh likouda mwahu. Ni ahnsou me e pwuredo ni wenihmwo, e rong en Samuel padahk, alehda nah doaropwehn luhk, oh idek: “Iaduwe, ien kelehpw kohwei de ien kahrehda ahi pwoud?” E pil koasoia: “Ma ahi pwoud sohte iang kohwei, ah ngehi I pahn kohwei pwehki kowe, Samuel.” Samuel inenen peren pwe Wiesława kapwaiada eh inou.

Erein padahk en Katamano kin wiawi, Samuel mwohndi rehn Wiesława oh kin kasalehiong ih iren Paipel kan me kin kohda. Liho inenen perenkihda duwen met. E perenki iang towehda Kataman wet oh kalahnganki kawehwe mengei kan me kin wiawi me pid duwen ire kan me inenen loal. E pil mwekidkihda duwen tohn mwomwohdiso ahr kin kasamwo ih oh kasalehda kadek. Sangehr mwo kohla, Wiesława kin nsenohkihla oh kalahnganki koasoandi en pali ngehn akan oh tepida kaukaule werekiong Sounkadehdehn Siohwa kan. Me keren e koasoia: “I namenekki ahi sohte kin men rong kumwail ni ahnsou me kumwail kin pwarodo ni ei wenihmw. Oh ni mehlel ih kahrepen ahi tepida rong audepen amwail koasoi iei pwehki kisin pwutak sounpar duwauo, pwehki Samuel.”

Duwehte Samuel me mih Poland, tohto irail Sounkadehdehn Siohwa pwulopwul kan me kin kapinga Koht sang ni ahr koasoi oh ahr wiewia mwahu. Ma kowe emen me pwulopwul, ele ke kak pil sewese irail aramas me mehlel kan en kak kalahngankihla mehkan me ngenin.