Diarada Ahl nan Sehd Tehlap

NAN dekehn Marshall, mie kisin deke kan me tohto sang 1,200, oh pali laud en deke pwukat kin mihmi ki piht keite ileilehda sang nansed. Irail kin mwadang en salongala ma ke ekis dohweisang irail nansed. Ahpw, mehn Marshall en mahs kan me kin seiloakseli nan wararail war kan kin kak kaweidih irail sang ehu deke lel ehu deke, oh pil kak diar de sapahllahng arail wasa nanpwungen square mwail silikis pahieu en rar en sehd en Pacific. Iaduwen irail kin wia met? Irail ale kaweid sang kisin “map” me mwomwen sohte wad ahpw uhdahn katep douluhl.

Sang arail koahieklahr, mehn Marshall pwukat kin esehla ma sahpw pahn dierek sang ni soangsoangen mwomwen ilok kan me pahn kin kasalehda ia wasa deke kan mie mwail 20 sang wasa irail mie. Kin mie soangen mwomwen ilok tohto me irail anahne en esehla, oh “map” wet kin wia mehn kataman ong irail. Ia mwomwen “map” pwukat? Nin duwen ahmw kilang nan kilel wet, kisin lepin tuhke me wiawihda sang kalewen kipar de pil nohk en tehn pahini, kin wiawihda ni mwomwen kairekdi en tangatang en ilok kan oh pirapirpene. Kisin pwili kan kin uhd katengetengdiong ni pwehn kilelehdi ia wasa ehu ehu deke mie.

Erein sounpahr tohto, kaweidki “map” wet sohte kin sansal ong koaros ahpw ohngete irail kan me pilipilda. Iaduwen emen tohn kaweid en seiloak nansed pwulopwul men kak esehla doadoahngki “map” wet? Sang arail ale kasukuhl oh doadoahngki dahme irail sukuhliki. Emen me koahieklahr men kak, ni rir, kasukuhlih sehla pwulopwul men ni ara pahn kin seiloakla ong deke keren kan. Ahnsou me tohnsukuhl menet esehla en pohnese mwomwen ehu ehu ilok kan, eh pahn kekeirada ah likilik de koapworopwor ong nah “map”wet. Mwurin ahnsou kis, eh kakehr seiloakseli nan madau kelehpw.

Pil duwehte, Mahsen en Koht, Paipel, kak wia mehn kaweid ong atail seiloak en mour. Ele tepio, emen pahn sewese kitail en wehwehkihla padahk mengei kan en Paipel. Mwuhr, ni atail pahn doulahte onohnop Mahsen en Koht oh doadoahngki mour en padahk kan, kitail pahn alehda likilik ong dahme e mahsanih. Sosua, tohn kaweid en mehn Israel ko, pil ale kaweid en kin wadewadek Mahsen en Koht pwehn kak “kanahieng soahng koaros me ntingdier loale.” Koht pil mahsanih ong Sosua, “Eri, ke ahpw pahn kepwehpwehla oh pweida.” (Sosua 1:8) Ehi, Paipel kak wia map ehu ong kitail pwehn kaweidih atail elen mour en pwung oh pweida mwahu.

[Kawehwehpen kilel kan nan ehu ehu pali 32]

©Greg Vaughn