Ke Kak Powehdi Ahnsoun Apwal
NAN ahnsou apwal pwukat, aramas tohto kin dadaurete pahn kahpwal kan me rasehng melimel kan. Ahpw, ong Kristian akan, limpoak ong Koht oh lelepek ong sapwellime koasoandi kan kin sewese irail en dadaurete. Iaduwen? Pasapengo kak dierek nan karasaras me Sises Krais ketin doadoahngki. E karasahda sapwellime tohnpadahk peik kan ong “ohl loalokong men me kin kauwada imwe pohn paip ehu.” Sises mahsanih: “Ni ahnsou eh pahn keteuda oh lapakehda, oh lapalahn kisinieng ipidohng ihmwo, e sohte pahn ohla, pwehki e kokoudahr pohn paip ehu.”—Madiu 7:24, 25.
Tehk me ohlo nan karasaraso, mendahki e loalokong, e pil kin lelong kahpwal kan—me rasehng keteu mosul, lapake, oh kisinieng kehlail. Kahrehda Sises sohte kin ketin kasalehda me sapwellime tohnpadahk kan pahn pitsang kahpwal kan koaros oh paieki soangen mour en meleilei me sohte pahn tokedi. (Melkahka 34:19; Seims 4:13-15) Ahpw e ketin mahsanih me sapwellimen Koht ladu lelepek kan kak kaunopadahng oh powehdi soangen kahpwal pwukat me rasehng melimel kan.
Sises tepikihda karasaraso ni ah ketin mahsanih: “Mehmen me kin rong ei padahk pwukat oh kin kapwaiada, e pahn rasehng ohl loalokong men me kin kauwada imwe pohn paip ehu.” Mehlel, Sises sohte kin ketin koasoakoasoia duwen dipwisou kan ong kauwada ihmw kan, ahpw e kin ketin koasoakoasoia duwen wiahda mour. Irail kan me kin kapwaiada mahsen en Krais kin doadoahngki loalokong oh kasalehda madamadau pwung. Sang ni arail kin doadoahngki dahme re kin sukuhliki, Irail kin wiahda arail lamalam oh wiewia kan pohn sapwellimen Krais padahk kan me rasehng paip ehu. E kesempwal me paip ehu nan karasaras wet sohte kin sansal ni masliki. Ohlo nan karasaraso anahne weirada “pwehl” loal pwehn lel paipo. (Luk 6:48) Duwehte met, sapwellimen Sises tohnpadahk kan kin nantihongete kekeirada soangen irair kan me kak sewese irail en karanih Koht.—Madiu 5:5-7; 6:33.
Dahme pahn wiawi ni ahnsou me kahpwal kan me rasehng melimel kan pahn song uwen kehlail en poahsoanpen Kristian en sapwellimen Sises tohnpadahk kan? Arail perenki peikiong sapwellimen Krais padahk kan oh arail irair en Kristian akan pahn wia utupen kehl erein soangen ahnsou apwal kan oh, me keieu kesempwal, erein ahnsoun melimel ieu me kohkohdo, Armakedon. (Madiu 5:10-12; Kaudiahl 16:15, 16) Ehi, sang ni arail kin idawehn sapwellimen Krais padahk kan, me tohto kin powehdi kahpwal kan me rasehng melimel kan. Ke pil kak wia duwehte met.—1 Piter 2:21-23.