Mengei en Wadek, Ehi, ahpw E Pwung?
NAN September 2005, pwihn en pelien lamalam ieu me ede Church of England pwungkihda en wiahda ehu soahng Paipel me adaneki The 100-Minute Bible (Paipel me aramas kak wadek ni minit 100). Pwe Paipel wet en wadawad ni erein minitte 100, Paipel kapw wet oaralapihada Palien Pwuhk Sarawi ni Lokaiahn Ipru ni irelaud 17 oh Palien Pwuhk Sarawi ni Lokaiahn Krihk ni irelaud 33, irail kihsang wasa kan me “sohte katepe” koaros nin duwen emen ohl ah koasoia. E mengei en wadek, ahpw e pwung?
Irail akan me kin kesempwalki esehla Paipel ese me kaidehn mwaren Koht, Siohwa kelehpw me kohsang nan kawehwe wet, ahpw wasa tohto inenen wekidekla. (Melkahka 83:18) Karasepe, irelaud 1 koasoia me Koht ketin “kapikada lahng oh sampah ni erein rahn weneu.” Ahpw Senesis 1:1 mahsanih ni sansal: “Ni ahnsou me Koht tepin kapikada sampah oh mehkoaros me mi pahnlahng.” Mwurin mwo, e uhdahn kasalehda me wiawihdahn sampah, reireiki “rahn” weneu, de erein ahnsou reirei ieu. Oh Senesis 2:4 kousapahlih erein ahnsou en kapikipikda pwon, e koasoia “Ih duwen sampah eh wiawihda oh mehkoaros pahnlahng eh kepikipikda.”
Nin duwen The 100-Minute Bible, Sohp, ohl lelepek emen, e ale uhwong sang “emen sapwellimen [Koht] ladu, Sehdan, . . . me ah pwukoa iei en kin kasonge aramas akan.” Ke kilang wekpeseng wasaht? Lepin lokaia “Sehdan” wehwehki “Sounpelian.” Kaidehn Sehdan sapwellimen Koht ladu, pwe ni mehlel ih imwintihti en Koht me keieu laud oh pein ih wiakihla ih sounkadip en aramas.—Kaudiahl 12:7-10.
Iaduwen Palien Pwuhk Sarawi ni Lokaiahn Krihk nan The 100-Minute Bible? Nan karasaras en sihpw oh kuht kan, Paipel kapw wet koasoia me Sises kupwurperenki irail kan me kin sewese “aramas soulipilipil iangahki aramas suwed akan”, ahpw Sises mahsanih me e kin kapaiada irail kan me wia mwahu ong sapwellime aramas me idawehn ih kan—‘rie’ kan. (Madiu 25:40) Koasoipen pwuhken Kaudiahl nan Paipel kapw wet koasoiahng me pid wadek kan me “Rom, Papilon lapalap, pahn ohla douluhl.” Ahpw, tohn sukuhl en Paipel kan ese me sohte kadehde ieu mie nan nting kan en tepin Paipel me kasalehda me Rom iei “Papilon lapalap.”—Kaudiahl 17:15–18:24.
Ong irail kan me men esehla Sounkapikpatail oh duwen kupwure, sohte mehkot kak wiliandi Paipel. Mehlel, wadek Paipel pahn daulih minit 100, ahpw wiawi wet pahn wahdo kitail kamwahu me keieu kesempwal. (Sohn 17:3) Ma ke pahn wia met, ke pahn ale ketingpomw kan.—2 Timoty 3:16, 17.