Karasaras en Emen me Kin Mehlel

NI AHNSOU kerendo, Nelma, tohn seisei de wia moahng men me kin kousoan nan Cruzeiro do Sul, Brazil, lelohng kasongosong me pid ah irair en lelepek. Ni ahnsou me lapake ehu lel ah wasahn kousoan, Nelma alehdi likou kei me irail akan me e kin sehk moangarail kin toukihda oh kadarodohng ih. Ni ah wie koasoakoasoane likou ko, e diarada nan ehu pwekid en rausis ko $1,000.

Mwohni me Nelma diarada kin pahrekiong uwen pweinen ah doadoahk en sounpwong isuh, oh e inenen anahne mwohni. Pein imweo ohkihlahr lapakeo, oh pali laud en ahn a pahpa oh rie ko arail dipwisou kan salongalahr. Ma e nainekihla mwohnio e kak kamwahwihala imweo pwon oh luwen mwohnio kakete pil sewese ekei ah peneinei. Ahpw, pwehki Nelma ahneki nsen mwakelekel me kin poahsoanda sang Paipel, met kahrehiong ih en dehr koledi oh nainekihla mwohnio.—Ipru 13:18.

Mandahn rahno, e mwadangala wasahn ah doadoahk mwohn ahnsoun doadoahk oh eker lih me kisekisehki ih likou ko. Nelma kalahngankihong liho likou ko oh kapatahiong me uhdahn e sohte kak nainekihla dahme e diarada nan likouo. Liho eri inenen perenkihda douluhl ah pwurehng alehdi nah mwohni ko. E katohrehla mwohnio pwehn pwainki nah tohndoadoahk ko. Lih en pisnis menet koasoia “En kin mehlel iei ehu irair me apwal en diar.”

Ehi mehlel, ekei mwein kin pehm me sohte katepen en kin mehlel. Ahpw en kin mehlel iei ehu irair me inenen kesempwal ohng irail akan me kin nannanti en kaperenda Koht mehlel, Siohwa. (Episos 4:25, 28) Nelma koasoia “I sohte pahn kin meir mwahu nipwong ma I wiahda ehu soahng tohrohr likin me I wiadahro.”