Kesempwal Sang Kohpada Duwen Iren Mesen Lahng

KERENIONG wehi koaros ahneki lepin padahk duwen iren mesen lahng: Pahnlahng poh weitahta nipwong sehla men perenki; pahnlahng poh weitahta nin menseng sehla men kanaiehng. Soun kasawih iren mesen lahng rahnpwukat kihda kahrepe kan ni pali en sains me iren mesen lahng ele wiawi duwehte lepin padahko koasoia.

Pil duwehte ni mwehin Sises, aramas akan ahnla sukuhliki pahnlahng oh kasawihada iren mesenlahng. Sises mahsanihong ekei mehn Suhs kan: “Ni eh kin soutikpene, kumwail kin nda, ‘Lakapw e pahn kaselel, pwe pahnlahng me poh weitahta.’ A nimenseng kumwail kin nda, ‘Rahnwet e pahn keteu, pwe pahnlahng me poh weitahta oh mahliok.’ Eri, kumwail kak kasawihada iren ahnsou sang ni mwomwen pahnlahng; ahpw . . . ” Ahpw dah? Sises pousehlahte mahsanih mehkot kapwuriamwei: “Kumwail sohte kak kasawihada kilel kan duwen ahnsou pwukat!”—Madiu 16:2, 3.

Dahkot me “kilel kan duwen ahnsou pwukat”? Mepwukat wia irair sansal tohto kan me kasalehda me Sises iei ih me Mesaia mehlelo me Koht kadarodo. Ah wiewia kan sansal ong aramas duwehte pahnlahng me poh weitahta. Ahpw pali laud en mehn Suhs kan pohnsehse kilelo me kasalehda me Mesaia samwadohr—mwekid ieu me kesempwal sang mesen lahng.

Rahnpwukat pil mie kilelo me uhdahn kesempwal en wehwehki sang poh en pahnlahng. Sises kohpada me sampah suwed wet ele pahn imwisekla pwe sampah mwahu kak tepida. E mahsanih me diren mwekimwekid kan me kohpene pahn kasalehda iahd wekidekla wet pahn wiawi. Nan mwekimwekid pwukat iei mahwen kan oh lehk kan me wiawi wasa koaros nin sampah. Sises mahsanih me ni ahnsou me kitail kilangehr mepwukat koaros, ahnsou en Sapwellimen Koht kadeik kerendohr.—Madiu 24:3-21.

Ke kilang “kilel kan duwen ahnsou pwukat”?