Manaman en Lowe
LOWEN giraffe reireiki ins 18 oh mwekid mwadang oh kehlail en katipwasang tehn tuhke kan sang rah kan. Uwen toutou en lowen blue whale duwehte uwen toutou en paliweren elephant. Medewehla uwen laud en kehl me anahn en kamwekid lowen blue whale!
Lowen aramas mwomwen sohte katepe me pid uwen laud, toutou, oh kehlail. Ahpw mie ah manaman me laud sang. Paipel mahsanih duwen kisin kisehn paliwar wet: “Dahme ke koasoia kak kolokol de kauwehla mour.” (Lepin Padahk 18:21) Ni mehlel, pak depe kitail kin diarada me lowen aramas akan kin doadoahngki manaman suwed ni arail wiahda koasoi likamw kan oh kadehde likamw kan me kak kauwehla, de kemehla mouren aramas akan me sohte diparail?
Duwehte met, lokaia kamedek kan kin kauwehla nanpwung mwahu en ahnsou werei. Lokaia lemei kan kin kauwehla pepehm en aramas akan. Pwehki kompoakepahn Sohp kin kaukauwe ih, e nsensuwedkihla oh koasoia: “Dahme kumwail kapwukapwunodehkin ie mahsen pwukan?” (Sohp 19:2) Tohnpadahk Seims kihda karasaras sansal me kasalehda manaman suwed en lowen aramas: “Lowen aramas me kisin kakon tikitik kis, ahpw e kak suweiki soahng laud tohto. Kumwail pil medewe duwen lauden wahl me kisin dimwamwahien kisiniei kis kak karongehla! Pwe lowatail kin rasehng kisiniei.”—Seims 3:5, 6.
Ni pali teio, manaman en lowen aramas kak kihong meteikan mour. Lepin lokaia kansenamwahu oh kamweit kan kin doarehla ekei aramas kan sang arail nsensuwed laud oh arail men kemehla pein irail. Kaweid likilik kan me kohda ni ahnsou konehng kan doarehla aramas tohto me kin doadoahngki wini kasahliel kan oh irail kan me kin iang tiahk lemei nanial kan sang arail mehla mwadang. Ni mehlel, wahn ewen aramas pwung men kin “kahrehda mour,” oh “rasehng kilel me wiawihkihda kohl oh kapwatkihda silper.”—Lepin Padahk 15:4; 25:11.
Ahpw, ahl me keieu mwahu en doadoahngki lowatail iei en kapinga Siohwa Koht, en pakairki rongamwahu en Wehin Koht, oh en padahkiong meteikan padahk mehlel kesempwal kan en Paipel. Pwekida? Sises mahsanih: “Oh iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”—Sohn 17:3; Madiu 24:14; 28:19, 20.