“Mehn Kadehdepen eh Loalopwoato Pahnlahng”

SOUNWIE koul kan oh sounnting kan kapinga maram nin duwen mehkot kaselel ieu sang mahsie. Karasepe, koul ehu me pwilisang rehn Koht mahsanih duwen lih emen me “inenen masamwahu oh kaselel, rasehng . . . maram.” (Melkahkahn Melkahka kan en Solomon 6:10) Oh sounmelkahka men likwerih ni karasaras maram “me wia mehn kadehdepen eh loalopwoato pahnlahng.” (Melkahka 89:37) Ia wehwehn mahsen met me pid duwen maram?

Maram kin kaukaule pidakih sampah ni rahn 27.3 koaros. Kahrehda maram eh lelepek kak kasalehda eh kin likilik. Ahpw, sounmelkahka menet ele ahneki wehwe loal tohrohr ehu nan eh madamadau. E likwerih maram “me wia mehn kadehdepen eh loalopwoato” nan koul en kokohp ieu duwen Wehio me Sises padahkiong sapwellime tohnpadahk kan en kapakapki.—Madiu 6:9, 10.

Daulih sounpar 3,000 samwalahro, Siohwa Koht ketin wiahda inou en Wehio rehn Nanmwarki Depit en Israel mahs. (2 Samuel 7:12-16) Kahrepe en inou wet iei koasoanehdi pwung ong Sises Krais, nin duwen kadaudoken Depit, pwehn sapwellimaniki mwoale kohkohlahte. (Aiseia 9:7; Luk 1:32, 33) Me dokedoke duwen mwoalen “kadaudok” en Depit, sounmelkahka koul: “E pahn poatopoat rasehng maram, me wia mehn kadehdepen eh loalopwoato pahnlahng.”—Melkahka 89:36, 37.

‘Me pahn kin kakaun nipwong’—maram—ihme e konehng en wia mehn kataman en ahn Krais kaunda poatopoat. (Senesis 1:16) Me pid duwen sapwellime Wehi, Daniel 7:14 mahsanih: “Sapwellime manaman en kaunda wasa pahn poatopoat, oh sapwellime wehi sohte pahn imwisekla.” Maram me wia mehn kadehde me katamankin kitail Wehio oh kapai kan me tohnsampah kan pahn ale.

[Kawehwehpen kilel kan nan ehu ehu pali 32]

Maram: NASA kilel