Koht Kin Ketin Mwasamwasahn Uhk?
IA DUWE, Siohwa Sounkapikadao, sapwellimaniki kehl en mahsanih wasa? Ei e sapwellimaniki! Paipel kawehwehda ni sansal: “Ih me ketikihong kitail masatail kan—e ahpw sohte kak mahsanih wasa?” (Melkahka 94:9) Silangin Siohwa uhdahn deisang mesen aramas. Kaidehn ihte e mahsanih mwomwatail liki ahpw e pil kin “sohng nan kapehd en aramas,” oh e kin ketin “tetehk” nsenen aramas. (Lepin Padahk 17:3; 21:2) Ei, e sapwellimaniki kehl en kasawih atail madamadau, dahme kin kamwakid kitail, oh atail ineng me keieu loale.
Siohwa ketin mwahngih kahpwal kan me kitail ele pahn lelohng nan atail mour, oh e ketin mwekidki atail pekipek kan. Sounmelkahka men ntingihdi: “KAUN-O kin ketin sinsile me pwung kan oh kin ketin karonge ar likwer kan. KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:15, 18) Ia uwen kansenamwahu en ese me Siohwa ketin wehwehki atail irair kan oh mwekidki pekipek kan sang nan mohngiongitail!
Siohwa Koht ketin mwahngih wiewia kan me wiawi ni rir. Ei, “mehkoaros . . . kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.” (Ipru 4:13) Kahrehda sohte lipilipil atail wiewia kan me mwahu de suwed, wiewia koaros sansal mwohn silangin Koht. (Lepin Padahk 15:3) Karasepe, Senesis 6:8, 9 mahsanih me “Noha kelehpw me keniken pahn kupwuren KAUN-O.” oh me “eh mour poadidiong Koht.” Ei, Noha kenikenla rehn Siohwa oh ale sapwellime kapai pwehki e peikiong oh utung mouren sapwellimen Koht kosonned pwung kan. (Senesis 6:22) Ni pali teio, aramas kan nan mwehin Noha kin lemei oh kin iang tiahk samin. Koht ketin mwahngih irair wet. E “ketin mahsanihada duwen aramas akan ar suwedlahr nin sampah, oh ar lamalam akan eh kin suwed ahnsou koaros.” Ni imwi, Siohwa ketin kamwomwala me suwed kan ahpw ketin doarehla mouren Noha oh eh peneinei.—Senesis 6:5; 7:23.
Ia duwe, Siohwa pahn ketin kupwurohkin uhk? Mehlel, Siohwa kin ketin “mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Ni ahnsou keren, e pahn ketin kasorehla aramas suwed kan koaros sang sampah oh doarehla irail kan me aktikitik ni mohngiong.—Melkahka 37:10, 11.