“Me Kin Wah Mwahu Ni Ar Mahlahr”

ARAMAS tohto mi nan sapwen Mediderenien padokedi tuhke apwraiasi nan arail mwetuwel. Tuhke pwukat inenen lingan oh wah kan iou. Patehng, irail pousehlahte kapwarehda wah daulih sounpar epwiki.

Nanmwarki Solomon en Israel en mahs kawehwehda mwomwen serepein en Sulam rasehng tuhke nih. (Melkahkahn Melkahka kan en Solomon 7:7) Pwuhken Plants of the Bible (Tuhke kan nan Paipel) koasoia: “Lokaiahn Ipru ong apwraiasi iei ‘tàmâr.’ . . . Me wiahla mehn sansal en mehn Suhs en pai oh lingan oh irail kalapw kihong lih akan.” Karasepe, rien Solomon serepein masamwahu adaneki Damar. (2 Samuel 13:1) Ekei pahpa oh nohno kan pil kihong ahdo ong neirail serepein kan.

Kaidehn lih masamwahu kante rasehng tuhke nih. Sounmelkahka men koulki: “Me pwung kan pahn pweida mwahu duwehte nih kan; re pahn keirda duwehte sidar en Lepanon kan. Re rasehng tuhke kan me poadidi nan tehnpas en KAUN-O, me kin pweida mwahu nan Tehnpas en atail Koht, me kin wah mwahu ni ar mahlahr oh kin mwomwen pwulopwulte oh kehlail ahnsou koaros.”—Melkahka 92:12-14.

Koasoi ni karasaras, irail me papah Koht ni lelepek erein arail ahnsoun mah kin duwehte tuhke nih lingan. Paipel mahsanih: “Mour werei iei ketingpen pwung; moangepwet iei kapwat lingan ehu.” (Lepin Padahk 16:31) Mendahki kehl en paliwararail kin luwet pwehki mahla, me mah kan kak ale arail kehl me pid wia kupwuren Koht sang ni kaukaule onop Mahsen en Koht, Paipel. (Melkahka 1:1-3; Seremaia 17:7, 8) Pwehki arail lokaia kaperen kan oh arail mehn kahlemeng mwahu, irail me mah lelepek kan wia lapalahn utupen kangoang ong meteikan oh kapwarehda wah pahr koaros, duwehte apwraiasi.—Taitus 2:2-5; Ipru 13:15, 16.