Karanih Koht
E Ketin Kesempwaliki Koasoandi Pwung
MIE pak aramas wiahda mehkot sapwung de lemei ong uhk oh aramaso sohte ale kalokepe oh sohte koluhla? E inenen apwal en dadaurete ma emen me ke lemeleme nsenohki uhk me wia met. Ke pahn idek, ‘Dahme kahrehda Koht ketin mweidohng met en wiawi?a Siohwa Koht ketin kalahdeki koasoandi sapwung koaros. Paipel kin padahkihong kitail me Koht pahn ketin kaloke irail me kin nsenkihte wiewia dihp. Kitail pahn tehkpene dahme wahnpoaron Pohl kasalehda nan pwuhken Ipru 10:26-31.
Pohl ntingihdi:“Ma kitail pahn nsenkihte wiewia dihp, mwurin atail marainkilahr padahk mehlel kan, solahr meirong ehu me pahn kak kamwakelehsang kitail nan dihp.” (Iretikitik 26) Aramas me kin nsenkihte wiewia dihp kin inenen suwed. Pwekida? Keieu, irail sohte kin wiahda dihp ehu pwehki arail luwet. Ekei pak kitail pil kin wiahda sapwung pwehki atail soh unsek. Ahpw irail kin pwurepwurehng wiahda dihp. Keriau, irail pein men wiahda dihp. Irail kin “nsenkihte wiewia dihp.” Re pil ahnla wiahda dihp. Kesiluh, irail kin wiahda dihp kaidehn pwehki irail sehse dahme re wiewia. Irail “marainkilahr padahk mehlel” duwen kupwuren Koht oh sapwellime koasoandi kan.
Ia kupwuren Koht ong aramas akan me kin nsenkihte wiewia dihp oh sohte koluhla? Pohl mahsanih me ‘solahr meirong ehu me pahn kak kamwakelehsang irail nan dihp.’ Sapwellimen Koht kisakis en tomw en Krais kak pwaindi dihp me kitail kin wiahda pwehki atail soh unsek. (1 Sohn 2:1, 2) Ahpw irail me kin pwurepwurehng wiahda dihp oh sohte koluhla kin kasalehda me re sohte kin katapanki kisakis kesempwal wet. Mwohn silangin Koht, irail kin ‘mwamwahliki Sapwellimen Koht Iehroso . . . oh kin kasaminehla’ sapwellime nta. (Iretikitik 29) Irail kin mwamwahliki Sises oh “kasaminehla” sapwellime nta, me wehwehki re wiahki mehkot me sohte katapan sang ntahn aramas soh unsek kan. Soangen aramas pwukat sohte pahn kak paiekihda meirong en Krais pwehki re sohte kin kasalehda kalahngan.
Dahme pahn wiawi ong me suwed kan? Koht ketin inoukihda: “I pahn ikih, I pahn dupukohng.” (Iretikitik 30) Irail me kin nsenkihte wiewia dihp oh kauwehla meteikan anahne ese met: Koht pahn ketin kaloke irail. Irail kin kalapw lelohng imwila suwed en arail dihp. (Kalesia 6:7) Mendahki ma met sohte pahn wiawi ni ahnsou wet, ni ahnsou keren Koht pahn ketin kadeik irail ni eh pahn ketikihsang koasoandi sapwung koaros sang sampah. (Lepin Padahk 2:21, 22) Pohl kihda peneu wet: “Meid kamasepwehk kowahlap, lohdiong pahn limmen Koht ieias!”—Iretikitik 31.
En esehla me Siohwa Koht sohte kupwurki dihp me aramas nsenkihte wiewia kak sewese kitail koaros ahpw keieu irail akan me lelohng kahpwal pwehki aramas suwed kan. Kitail kak koapworopworki me Koht pahn ketin kapwungala sapwung kan ni unsek pwehki e kin ketin kalahdeki koasoandi sapwung koaros.
[Nting tikitik me mi pah]
a Pwehn wehwehki dahme kahrehda Koht kin ketin mweidohng lokolok en mie, kilang pali 70-79 nan pwuhken Loalokong Me Pahn Kahluwalahng Mour Soutuk, me Sounkadehdehn Siohwa kan wiahda.