Emen Kisin Serepein Kadek

KISIN serepein en Brazil men me sounpar duwau nehkpeseng mwohni me e nekidala oh wiahda kis riau. Ehu uwen tala 18 ah ehu tala 25. E kihong me tikitiko nan kohpwahn sawas ong Wasahn Kaudok en Sounkadehdehn Siohwa kan pwehn sewese arail anahn. Ih eri kadaralahng ohpis en Sounkadehdehn Siohwa kan mwohni me laudo iangahki kisinlikou ieu. Nah kisinlikouo koasoia: “I men kihda sawas wet ong doadoahk en kalohk me kin wiawi nan sampah pwon. I men sewese riei Kristian akan nan sampah pwon ong arail kin kalohki rongamwahu. I kihda sawas wet pwehki ei limpoak laud ong Siohwa.”

En kisin serepeino pahpa oh nohno padahkihong ih duwen kesempwalpen eh kin iang wia dahme e kak wia nan doadoahk en kalohk. Ira pil padahkihong ih en kin meirongkihong Siohwa soahng kesempwal kan me e ahneki. (Lep. Pad. 3:9) Duwehte kisin serepeino, kitail koaros en kin ngoahngki iang wia doadoahk en Wehio nan atail wasa oh pil nan sampah pwon!