Ira Solahr Masak Imwio

MWOHNTE pahr 1980, Gary oh Karen kamehlelehla me imwin sampah kerendohr. Ira eri keseula likin kahnimwo. Ira koasoanehdi me ira pahn pein koadoahkihada dahme ira anahne pwe ira en kak momourki. Ira men pitsang imwin sampah.

Ira pwainda pwuhk kan, ira pil iang kasukuhl kan oh pil koasoiong aramas tohto pwe ira en kak esehla oh koahiekla. Ira wiahda ara mwetuwel oh padokedi tuhkehn mwenge 50. Ira nahkpene weren tuhke kan oh dipwisoun doadoahk kan. Ira sukuhlki duwen padokedi wahnsahpw akan oh wiepe kan me kak kahrehiong kenera wahnsapw kan en kak mihmi ahnsou werei. Emen kompoakepahra padahkihong ira mwomwen ara pahn kemehla mahn akan, lekehdi oh wiahda pwehn mihmi werei. Karen sukuhlki duwen e pahn kak ese kalohwen tuhke oh tuhke kan me aramas kak kang ma ehu rahn ira pahn apwalada. Gary sukuhlki wiahda leh sang wahn korn, wiahda stohp mete ehu, oh kauwada ihmw ehu me ira sohte anahne pwain pihl de lioal ape.

Karen nda: “Pwehki irair en sampah susuwedla ni ahnsowo, I medewe me imwin sampah kerendohr.” Gary pil nda: “Duwehte me pwulopwul tohto, I iang pwihn ehu me kin song en kauhdi tiahk en lipilipilki aramas, mahwen nan Vietnam, oh mwersuwed me kin wiawi. Ahpw I mwadang nsensuwedla. Likamwete aramas pahn pein kauwehla arail mour.”

Gary eri nda: “Ehu nipwongo, mie ekis ei ahnsou kahrehda I ale Paipel ehu oh wadek sang Madiu lel Kaudiahl. Erein pwohng pahieu, I pwurehng wadekala. Ni kelimau en menseng, I ndaiong Karen: ‘Kitail wie momour nan imwin rahn akan. Ni ahnsou keren, Koht pahn ketin kamwakelehda sampah. Kita anahne rapahkihda ihs me pahn pitla.’” Ira eri tepida kohla ni ehuehu sarawi pwehn rapahki aramas akan me men onopadahng imwio.

Mwurin ahnsoukis, emen Sounkadehdehn Siohwa pwarala rehra oh onop en Paipel tepida wiawi. Karen nda: “I uhdahn perenda pwehki e kawehwehda mwahu iren Paipel kan ong ie. I kin raparapahki dahme mehlel duwen imwio oh met I diaradahr. Mie koapworopwor ong ahnsou kohkohdo. Ahpw me mwahusang met, I tepida ahneki nanpwungmwahu rehn Semei nanleng me iei Koht, Sounkapikada en nanleng oh sampah.”

Gary nda: “Miehla wehwehn ei mour. Ni ei tepida onop Paipel, I sohte men uhdi. I wadek kokohp kan en Paipel, kasawih mehn kadehde kan ma mehlel imwio pahn leledo oh met e kahrehiong ie en kamehlele me Koht pahn ketin mwekid ni ahnsou keren. I medewe: ‘Aramas anahne kaukaunop, kaidehn ong kahpwal kan ahpw ong mour me Koht kupwurki kitail en ahneki.’” Gary oh Karen wehwehkihla soahng mwahu kan me pahn wiawi ahnsou kohkohdo. Ira solahr pwunodki duwen imwin sampah ahpw met ira kamehlele me Koht pahn ketikihsang kahpwal kan en aramas oh pahn ketin wiahda sampah en paradaisla.

Dahme Gary oh Karen kin wia ahnsou wet mwurin sounpar 25? Karen nda: “I kin pousehlahte kakairada ei limpoak ong Siohwa Koht oh ei pwoson ih. I kin song en sewese meteikan en pil wia soahngohte. Ngehi oh Gary kin sawaspene pwe at peneinei en kak kehlail oh ehupene ni at kaudok ong Koht. Se kin song en wiahda koasoandi mwahu oh nantihong en dehr kedirepwkihla soahng kan me sohte kesempwal pwe sen kak sewese meteikan oh arail anahn akan.”

Gary pil nda: “I kin kaukaule kapakapki Wehin Koht en pweida oh kamwahwihala en aramas kahpwal. Ehuehu ahnsou me I kin ehukihong meteikan rongamwahu en Wehin Koht, I kin kapakapki pwe ien kak ehukihong meteikan ekei koapworopwor kan sang nan Paipel. Erein sounpar 25, Siohwa kin ketin sapengla kapakap wet. Ngehi oh Karen kamehlele me kereniong Siohwa pahn ketin wiahda wekidekla laud kan ong sampah ahpw se solahr masak imwio.”—Madiu 6:9, 10; 2 Piter 3:11, 12.

[Kilel nan pali 9]

Met Gary oh Karen kin perenki sewese meteikan en ahneki koapworopwor sang nan Paipel