Paipel Kin Sawas nan Atail Ahnsou
“Sapwellimomwi mahsen, iei serepei, mehn kaweid ie, oh kamarainpen elei kan.”—MELKAHKA 119:105.
IA DUWEN PAIPEL EH WEKSANG PWUHK TEIKAN? Ekei pwuhk ele wia pwuhk kaselel kei, ahpw re sohte konehng en kaweid atail mour. Oh pwuhken kaweid kan nan rahnwet anahne kin wekwekdekla. Ahpw Paipel kasalehda me “mehkoaros me ntingdier nan Pwuhk Sarawi e ntingdier pwe en padahkih kitail.”—Rom 15:4.
KARASEPE: Mendahki Paipel sohte wiawihda en kihda kaweid ong ahneki roson mwahu, e audaudki kaweid kan me konehng roson oh pepehm mwahu. Karasepe, e mahsanih me “nan kapehd meleilei kin karosonehda paliwar.” (Lepin Padahk 14:30) Paipel pil kihda mehn kataman: “Aramas me sohte kin men patehng meteikan kin nsenohkihte pein irail; re kin sapwungki mehkoaros me aramas koaros ese me pwung.” (Lepin Padahk 18:1) E pil mahsanih me “kihwei kaperen sang ale.”—Wiewia 20:35.
DAHME ROPOROP KASALEHDA: Meleilei, ahneki nanpwungmwahu kehlail rehn meteikan oh kadek kak karosonehda paliwar. Pwuhk ehu koasoia: “Ohl kan me kin kalapw lingeringer kin keh mwoatorala laudsang irail kan me kin kanengamahiong arail lingeringer.” (The Journal of the American Medical Association) Ehu roporop me wiawi nan Australia erein sounpar eisek diarada me “me mah kan me kin kompoakepahnki me tohto oh meteikan me re kak ehukihong arail ire rir kan kak mour werei sang meteikan.” Oh nan pahr 2008, soun roporop kan sang Canada oh Amerika diarada me “emen eh kin doadoahngki nah mwohni ong meteikan kin kahrehiong ih peren laudsang ma e doadoahngki ong pein ih.”
IA OMW MADAMADAU? Ke pahn likih kaweid en roson mwahu sang pwuhk teikan me wiawihda sounpar kereniong 2,000 samwalahro de Paipel weksang pwuhk teikan?
[Blurb nan Pali 8]
“Uhdahn I pwungki Paipel . . . pwehki e wia pwuhk ehu me audaudki kaweid kan me inenen mwahu ong roson mwahu.”—HOWARD KELLY, M.D., KISEHN PWIHN EN THE JOHNS HOPKINS UNIVERSITY SCHOOL OF MEDICINE