PEIDEK KAN SANG SOUNWADAWAD KAN
Mehn “kadehdepen mehkoaros” oh “kilel” dahieu me emenemen Kristian keidi alehdi sang rehn Koht?—2 Kor. 1:21, 22.
Mahso, rihng ehu kin ped nan waks pwehn kamanahla audepen kisinlikou kesempwal ehu
Kadehdepen mehkoaros: Nin duwen me ehu dikseneri koasoia, lepin lokaiahn Krihk me kawehwehdi “kadehdepen mehkoaros” nan 2 Korint 1:22 iei “lokaia ehu me kamanamanlahr pahn kosonned oh kin kadoadoahk ong pesines.” Met wehwehki “keieun pwilidi en mwohni, pwilidi en mwohni, koasoandi en wia pwapwain, inou ehu, me kin pwainla ekis en pweipweio mwohn uhdahn pweinehu pahn pweipweila, oh met kak kamanahla kisinlikou kesempwalo de kamanahla contract ehu.” Me pid me keidi ko, pweinen pweipwei unsek ehu de keting me 2 Korint 5:1-5 kasalehda kin pid arail en alehda mour ehu nanleng me sohte kak ohla de mehla. Keting wet pil iangahkihte arail alehdi kisakis en mour soutik nin duwen ngehn kei.—1 Kor. 15:48-54.
Ni lokaiahn Krihk en rahnwet, ehu lepin lokaia me kak kadoadoahk duwehte met iei rihng en inou en pwopwoud. Met wia karasaras konehng ehu ong irail ko me pahn wiahla ni karasaras kisehn sapwellimen Krais werek.—2 Kor. 11:2; Kaud. 21:2, 9.
Kilel: Mahso, kilel ehu kin kadoadoahk pwehn sainla kadehdehpen ihs me pwung en ahneki mehlelpen inou ehu. Ong irail me keidi kan, re “kileldi” ni karasaras, sang ni arail keikihdi sapwellimen Koht manaman nin duwen sapwellime kei. (Ep. 1:13, 14) Ahpw kileldi wet saikinte uhdahn nekier. Kileldi wet pahn wiawi mwohn me keidio mehla ahpw lelepekte de pahn wiawi mwohnte kahn kamakam kowahlapo tepida.—Ep. 4:30; Kaud. 7:2-4.