Lepin Mahsen Ehu me Uhdahn Kadek!
“LIH.” Ih met me Sises kin ekei pak ketin ekerki lih akan. Karasepe, ni eh ketin kamwahwihala emen lih me kospenekiher eh soumwahu erein sounpar 18, e mahsanih: “Lih maiauda sang omw soumwahwen!” (Luk 13:10-13) Nin duwen tiahk, Sises pil ketin doadoahngki lepin lokaia wet ni eh kin mahseniong eh nohno oh ni ahnsowo, met kin kasalehda kadek. (Sohn 19:26; 20:13) Ahpw mie ehu lepin lokaia me pil kasalehda kadek laudsang met.
Paipel kin doadoahngki lepin lokaia ehu me inenen kadek ni eh kin eker ekei lih akan. Sises ketin doadoahngki lepin lokaiao ni eh mahseniong emen lih me kin kohkohwahki mehnwarmwowi erein sounpar 12. Mwomwen en liho patohla rehn Sises sohte pahrekiong Kosonned en Koht, me mahsanih me aramas me ahneki soangen soumwahwo kin samin. Emen kak akupwungki me liho anahne katohre ih sang meteikan pwehki eh soumwahu. (Lip. 15:19-27) Ahpw liho uhdahn anahne sawas. Ni mehlel, e kin “reperepen mour rehn sounwini tohto oh kesehkilahr nah mwohni kan koaros, ahpw sohte katepe, pwe e susuwedlahte.”—Mark 5:25, 26.
Liho dillahte nan pokono lel pohn pelikien Sises oh doahke pwungipen sapwellime likowo. Ni ahnsowohte eh soumwahwo pa madada. Liho koapworopworki me sohte me pahn kilang dahme e wiao, ahpw Sises ketin keinemwe: “Ihs me doahke ieo?” (Luk 8:45-47) Ni liho pehmadahr me e dierekdahr, e ahpw rerrer keilahng mpen Sises poaridiong mwohn aluweluwe kan “patohwanohng mwohn aramas koaros kahrepen eh doahke Sises.”—Mark 5:33.
Pwehn kameleileidi liho, Sises mahsanih ni kadek: “Nei serepein, omw pwoson me kakehlaiukada.” Nin duwen me sounsamanih Paipel kan koasoia, lepin lokaia wet “nei serepein” ni lokaiahn Ipru oh Krihk kak wehwehki, ni karasaras, en kasalehda “kadek oh nsenoh.” Sises pil ketin doulahte kamweitala liho ni eh mahsanih: “Kohkohwei ni popohl, pwe ke kehlaildahsangehr omw soumwahwen.”—Mark 5:34.
“Nei serepein.” Iei lepin lokaia wet me ohl en Israel kepwehpweo Pohas ekerki lihen Mohapo Rud. Pil mie kahrepen Rud eh kin peikasal pwehki e kin rik kadok en parli nan sapwen ohl emen me e sehse. Pohas nda, “Rong ie mahs, nei serepein.” E kangoange Rud en doulahte rik kadok en parli kan nan eh mwahto. Rud poaridi mwohn Pohas lel nanpwel oh idek dahme kahrehda e kadekohng ih pwehki ih mehn liki men. Pohas sapeng ih ni eh pwurehng kamehlelehiong ih: “I rongehr duwen soahng koaros me ke wiahiong Naomi, inen omw pwoudo, . . . KAUN-O, . . . en ketikihong uhk keting laud ehu!”—Rud 2:8-12.
Ia uwen Sises oh Pohas ara wia mehn kahlemeng mwahu ong elder kan! Ekei pak, ele elder riemen pahn tuhwong sister men me anahne kaweid oh mehn kangoang sang Paipel. Mwurin ara kapakapki sapwellimen Siohwa kaweid oh rong kanahieng dahme sistero nda, elder ko pahn kakehr sewesehki kaweid kansenamwahu kan sang Mahsen en Koht.—Rom 15:4.