Mehn Kadehde Kehlail Ehu Sang ni Mesen Nting en Ipru me Keieu Tikitik

Kitail kak uhdahn kamehlele me sapwellimen Koht inou koaros pahn pweida? Sises ketin kamehlele met, oh sapwellime padahk kan kin kakehlaka pwoson en irail me kin rongorong ih. Tehk karasepe me e ketikihda nan sapwellime Padahk en Pohn Dohl, me kileldi nan Madiu 5:18, NW: “I ndaiong kumwail ni mehlel me mehnda ma lahng oh sampah pahn sohrala, sohte ehu mesen nting me keieu tikitik de ehu lain en mesen nting pahn sohrasang Kosonnedo lao soahng koaros pahn pweida.”

Mesen nting me keieu tikitik ni irekidien mesen nting kan ni Ipru iei י (yod), me iei tepin mesen nting en Tetragrammaton de mesen nting kan ong mwar sarawi en Koht, Siohwa.a Patehngete lepin lokaia kan oh mesen nting kan me mi nan Kosonned en Koht, sounkawehwehn kosonned ko oh Parisi kan kin wiahki ehuehu “lain en mesen nting” nin duwen mehkot me inenen kesempwal.

Sises mahmahsanih me e mengei nanleng oh sampah en sohrala sang mesen nting me keieu tikitik nan Kosonnedo en dehr pweida. Ahpw Paipel kasalehiong kitail me nanleng oh sampah pahn mihmi kohkohlahte. (Melkahka 78:69) Eri met kasalehda me pil soahng keieu pisetik kan en Kosonnedo uhdahn pahn pweida.

Ia duwe, Siohwa Koht kin ketin nsenohki soahng pisetik kan? Ei, uhdahn. Tehk met: Mehn Israel en mahs ko ale kehkehlik en dehr kauwehla tihn sihmpwul en Pahsohpao. (Eksodus 12:46) Ire pisetik ieu met. Irail wehwehki dahme kahrehda irail sohte mwahn pahn kauwehla tih pwoat rehn mahno? Mwein soh. Ahpw, Siohwa Koht mwahngih me ire pisetik wet wia kokohp ehu me pid Mesaiao, me sohte tih pwoat reh pahn ohla ni ahnsou me e pahn kamakamala ni tuhkehn kalokoloko.​—Melkahka 34:20; Sohn 19:31-33, 36.

Dahme en Sises mahsen kan padahkihong kitail? Me kitail pil kak uhdahn kamehlele me sapwellimen Siohwa Koht inou kan koaros pahn pweida, lella ire pisetik kan. Ia uwen met e wia mehn kadehde kehlail ehu sang ni mesen nting en Ipru me keieu tikitik!