“Koht Ketikette Ia?”

NI KAHPWAL KAN AR WIAWI, MIE PAK KE MEDEWE, ‘KOHT KETIKETTE IA?’ DE NAN OMW MOUR, MIE KAHPWAL EHU ME KAHREHIONG UHK KEN IDEK MA KOHT KETIN NSENOHKIN UHK?

Ele mwein ke ahneki en Sheila pepehm, me kin mi nan Amerika. E tikida nan peneinei ehu me poadidiong pelien lamalam. E nda: Sangete ni ei tikitik kohda, I kin men karanihala Koht pwehki ih atail Sounkapikada. Ahpw, I pehm me I saikinte karanihala ih. I medewe me e ketin kilikilang ie, ahpw sang wasa doh. I sohte kin medewe me Koht ketin kailongkin ie, ahpw I pil sohte kamehlele me e ketin nsenohkin ie.” Dahme kahrehda Sheila peikasalki me Koht ketin poakohng ih? E koasoia: “Ei peneinei kin lelohng kahpwal kan, ehu kin kohdo sohla pwand a ehu pil kohdo, oh e mwomwen me Koht sohte douluhl kin ketin sewesei kiht.”

Duwehte Sheila, ke mwein kamehlele me Koht Wasa Lapalahpie ketin mie. Ahpw, mwein ke kin medewe ma e kin ketin uhdahn nsenohkin uhk. Ohl pwung Sohp me kin pwoson kehl oh erpit en Sounkapikadao, ahneki soangen peikasalohte. (Sohp 2:3; 9:4) Mwurin kahpwal ehu eh lelohng Sohp, a pil ehu kahpwal pwarada, oh e sohte kak pitsang. Ih eri kalelapak rehn Koht: “Dahme komwi ketin rirkihsang ie? Dahme komwi ketin wiahkin ie imwintihti men?”​—Sohp 13:24.

Dahme Paipel mahsanih? Koht me kitail en kapwopwohneki ni kahpwal ehu eh wiawi? Mie mehn kadehde me Koht kin ketin nsenohki aramas akan oh pil emenemen kitail? Me pid emenemen kitail, mie emen rehtail kak uhdahn ese ma e kin ketin tehk kitail, mwahngih kitail, poakeikitailla, de sewesehkin kitail atail kahpwal kan?

Ire kan en mwurin met, kitail pahn tehkpene dahme kepikipik kan kin padahkihong kitail duwen Koht eh kin ketin nsenohkin kitail. (Rom 1:20) Kitail eri pahn kasawih dahme Paipel kin kasalehda duwen sapwellimen Koht nsenoh. Ni atail kalaudehla atail “kin esehla ih” sang sapwellime kepikipik oh Mahsen, atail kamehlele me “eh kin ketin nsenohkin kitail” pahn pil laudla.​—1 Sohn 2:3; 1 Piter 5:7.