Soangsoangen Aramas Pahn Kak Ale Komour
1 Siohwa “kin ketin kupwurki aramas koaros en ale komourparail oh marainkihla me mehlel.” (1 Tim. 2:4) Edetehn koaros aramas mwekidki dahme irail sukuhliki sang pahpa/nohno oh peneinei oh pil soangen irair me irail tikida loale oh pil wasao me irail kin mihmi ie, aramas koaros mie arail pilipil oh emen emen anahne pilida iaduwen e pahn doadoahngki eh mour. Irail kak pilida en wia me mwahu oh mour, de irail kak pilida en wia me suwed oh mehla. (Madiu 7:13, 14) Iaduwen wehwehki met kin kak sewese kitail en medeweiong aramas ahnsou me kitail pahn kalohki rongamwahu en Wehin Koht ong irail?
2 Kitail sohte pahn medemedewe me ihte emen pahn perenki rong padahk mehlel pwehki wehi de keinek me e kohsang ie de soangen aramas dah ih. Padahk mehlel kak kamwekid irail me sohte sukuhl de irail me iang sukuhl laud, irail me kin pid politik, irail me koahiek ni arail palien doadoahk, irail me sohte kin kamehlele me mie Koht, irail me kin kamehlele me kitail sehse ma mie Koht de sohte, oh pil irail me ndandki dihp laud me irail wiahda. Aramas me kohsang soangsoangen irair kan kasalehdahr me irail kak kawukila arail mour oh men mour nan sapwellimen Koht sampah kapw. (Lepin Padahk 11:19) Ihme kahrehda, kitail sohte pahn pweiek en koasoiong aramas koaruhsie me kohsang soangsoangen mour pwehn kalohk ong irail duwen Wehio.
3 Medewehla Karasepe Pwukat: Emen ohl medewehla en kemehla ohlo me pwoudki ah nohno ahpw e sohte wia. Mwuhr, e pil medewehla en kemehla pein ih ahpw e sohte kak. Mwurin mwo, e selidi pwehki e pirap oh netkihla wini suwed (drugs), oh ah pwopwoud ohla. Rahnwet, e kin mehlel ong eh doadoahk, sohlahr kin pirap, e nsenamwahuki eh pwopwoud met, oh pil e nanpwung mwahu rehn ohlo me pwoudki eh nohno. Dahme kahrehda e wukila? E onopki Pwuhk Sarawi rehn Sounkadehde kan en Siohwa oh kin kapwaiada dahme e sukuhliki. E sansal me Siohwa sohte medemedewe me ohlo sohte kak koluhla mehlel.
4 Emen lih me kin wia kasdo (TV actress) sohte kin perenki eh mour. Ahpw pwehki e pwuriamweikihla tiahk mwahu en Sounkadehde kan, e tepida onop Pwuhk Sarawi, oh e uhd tepida kalohk ong mehteikan oh kasukuhlih irail rongamwahu en Wehio. Koaros wasa kan me e kin kalohk, aramas pohnese ih, ahpw e kin perenki kawehwe ong irail me e mwahuki irail en wehwehki me ih emen Sounkadehde kan en Siohwa, kaidehn liho me wia kasdo.
5 Ni emen Sounkadehde kan koasoanehdi en onop Paipel rehn emen me kin subscribe makasihn Watchtower, emen lih (mehn mpe) rong duwen koasoandi en onop oh iang towehda. Liho mwadang kadehde me Sounkadehde kan en Siohwa kin kalohki padahk mehlel, mehkot me e rapahki wereila! Liho oh ah pwoudo kauwehla inou en mweipeseng me ira wiahda oh kamwahuiala nanpwungara. Liho pil kin wia wunani oh kin iang pwihn en wunani, ahpw e mwadang kesehla nah pwuhken wunani oh pil soahng koaros me pid wunani. E mwadang tepida iang mihding kan oh kin koasoiong eh peneinei oh kompoakepah kan duwen pwoson mehlel me e ahpwtehn diarada. Ni ahnsouwet, e kin ngoangki koasoiong mehteikan.
6 Kitail sohte pahn lipilipilki aramas oh kadeik irail. Ahpw, kitail en ngoangki kalohki rongamwahu ong aramas wasa koaros. Kitail uhdahn wehwehki me Siohwa, me kin “kasawih nan mongiong en aramas akan,” pahn wia “Sounkamour en aramas koaros.”—1 Sam. 16:7; 1 Tim. 4:10.