Kahluwa Tohnsukuhl en Paipel kan Ong Pwihn en Sounkadehdehn Siohwa kan
1 “Rohngo lohkselier ni lokaia 200 samwa. Rohngo lohkseli oh lelohngehr sahpw 210 samwa. Rohngo kin lelohngehr aramas koaros. Rohngo kisehn doadoahk ehu me keieu laud nan sampah, oh kin kaminiminpene aramas rar rar kei nan sampah pwon. Sangete sounpahr epwiki samwalahro, Sounkadehdehn Siohwa kan kin soandi mwahu pwehn wia doadoahk wet!”
2 Ihme tepin lokaia kan me video Jehovah’s Witnesses—The Organization Behind the Name koasoia. Video pil kin sapengla peidek pwukat: Ihs Sounkadehdehn Siohwa kan? Iaduwen pwihno kin koasoanehdi arail koasoandi kan? Ihs me kin kaunda pwihno? Ihs me kin sewese? Tohto kin pwuriamweiki me “Sounkadehdehn Siohwa kan sampah pwon kin ale kaiahn nin duwen pwihn ehu pwehn sewese mehn mparail kan en pwosonla Paipel,” oh Sounkadehde kan kin kangoange mehteikan en pein kilang atail pwihn. Mwurin emen lih me kin onop Pwuhk Sarawi kilang video, e sengiseng oh koasoia: “Aramas soh kin kilang me pwihn wet iei pwihn en Koht mehlel, Siohwa?”—Tehk 1 Korint 14:24, 25.
3 Emen lih me kin ekei pak kin onop Pwuhk Sarawi ahpw ahnsou werei sohte kin mwekidki met pwehki e sohte kak kamehlele me padahk en Trinity me sapwung, pil kilang video iangahki eh pwoud. Re inenen pwuriamweikihla dahme re kilang oh kilang video pak riau ni pwohngohte. Ni ahnsou me liho pwurehng tuhwong sister me kin onop Pwuhk Sarawi reh, e ndaiong sistero me e men wiahla emen Sounkadehde. Liho padahkiong sistero me e kin medemedewe laud duwen padahk en Trinity oh sohte kasawih pwihn en Sounkadehdehn Siohwa oh aramas kan me kin iang pwihno. Ahnsou me e kilang video, e pohnese me e diaradahr sapwellimen Koht pwihn mehlel. E padahkiong sistero me e men mwadangete tepida kalohk sang ihmw-lel-ihmw. Ahnsou me sistero padahkiong ih duwen kahk kan me anahn pwehn wiahla emen sounkalohk me saikinte papidais, liho nda: “Nna, kita tepida!” Liho kihsang ede nan pwuhk en eh pelien lamalam me e kin iang mahs, oh tepida kalohk, oh met kak koasoiong aramas pwehn kasalehda me padahk en Trinity sapwung.
4 E sansal sangete mahs me tohnsukuhl en Paipel kan kin mwadang kakairada oh wiahla emen Kristian mah ma e pohnese sapwellimen Siohwa pwihn oh miniminiong pwihno. E kesempwal en tehk me mwurin aramas 3,000 papidaisla ni Pendekos, “re kin poadidiong ale padahk sang rehn wahnpoaron ko, oh miniminiong me pwosonlahr akan.” (Wiewia 2:42, footnote) E kesempwal kitail en sewese tohnsukuhl en Paipel kan en wia duwehte met rahnwet. Iaduwen kitail kak sewese irail?
5 Ale Ahmw Pwukoah: Koaros me kin iang doadoahk en katohnpadahkih aramas anahne wehwehki me eh pwukoah iei en kaluhwa tohnsukuhl en Paipel kan ong sapwellimen Koht pwihn. (1 Tim. 4:16) Ehu ehu ahnsou me ke kin onop rehn aramas, ke pahn kilangwong aramaso me ehu rahn e kak inoukihong Siohwa eh mour oh papidaiski pihl. Ehu peidek me kin wiawi ong irail me pahn papidais iei: “Ke kin wehwehki me ahmw inoukihong Koht ahmw mour oh papidaisla kin wehwehki me ke wiahla emen Sounkadehdehn Siohwa oh ke pahn miniminiong pwihn wet me kin mwekidki sapwellimen Koht ngehn sarawi?” Ihme kahrehda, e kesempwal aramaso en wehwehki me e sohte kak papah Koht ma a sohte kin miniminiong mwomwohdiso en Kristian mehlel kan.—Madiu 24:45-47; Sohn 6:68; 2 Korint 5:20.
6 Nantiong en kasukuhlikihong tohnsukuhlo duwen mwomwohdiso en ahmw wasa oh pwihn en Sounkadehdehn Siohwa kan en sampah pwon. Koasoia met mwurin ehu ehu ahnsou me ke kin onop reh, sangete ni ahnsou me ke tepida onop reh. Sangete nin tepio, luhke tohnsukuhlo ong mihding kan, oh nantiong en luhke ih ahnsou koaros.—Kaudiahl 22:17.
7 Doadoahngki Mehn Doadoahk Me Miehr: En doadoahngki brochure Dahme Koht Kupwurki Kitail en Wia? oh pwuhken Ke Kak Mour Kohkohlahte Nan Paradais Nin Sampah me pahn keieu mwahu en onop Paipel rehn aramas akan. Brochure oh pwuhk pwukat kin kasalehda ia uwen kesempwal en miniminiong mwomwohdiso. Ni kaimseklahn iren mehn kasukuhl 5 nan brochure Kupwurki koasoia: “Ke anahne kaukaule sukuhlki duwen Siohwa oh kapwaiada sapwellime kosonned akan. Kaukaule iang towehda mihding kan nan Kingdom Hall en Sounkadehdehn Siohwa kan pahn sewese iuk en wia met.” Pwuhken Mour Kohkohlahte kin pak tohto kangoange tohnsukuhlo en iang towehda mihding kan oh miniminiong mwomwohdiso. Mie kilel en Kingdom Hall ieu me mihmi ni pali 190, oh dahme ntingihdi pahn kilelo koasoia: “Luhk kohwong uhk en iang towehda mihding kan en Sounkadehde kan en Siohwa.” Irelaud 26, oh parakrap 17 koasoia: “Ma ke onop Paipel ekis werei rehn Sounkadehde kan en Siohwa, ele ke iangehr towehda mihding kan nan Kingdom Hall. En wiahki ahmw tiahk kaukaule en mwohdong mihding pwukat.” Ni atail kin onop rehn aramas, kitail pwukoahki koasoia soahng pwukat nan atail onop.
8 Brochure me oaralap koasoia Jehovah’s Witnesses—Unitedly Doing God’s Will Worldwide iei ehu mehn doadoahk kaselel me pahn sewese aramas en wehwehki me Siohwa kin doadoahngki pwihn sansal ehute pwehn kapwaiada kupwure kan. Pwehki brochure kin koasoiada duwen atail kalohk, mihding kan oh pwihn en Sounkadehde kan en Siohwa, soahng pwukat pahn kangoange aramaso me wadek brochure en miniminiong kitail ni atail kin papah Koht. Ni ahnsou me ke tepida onop Paipel rehn emen, ke kak kihong ih nah brochure pwehn pein wadek. Kitail sohla pahn onopkihong aramas akan brochureo duwehte atail kin wia mahs.
9 Ekei video kan me Society wiahda kak kahluwa tohnsukuhl en Paipel kan ong pwihn en Sounkadehdehn Siohwa kan. E pahn mwahu ma irail kak kilang (1) The New World Society in Action, kousapahl en kasdo en 1954 me kin kasalehda iaduwen sapwellimen Siohwa pwihn kin doadoahk ni ahl en limpoak oh soandi mwahu; (2) United by Divine Teaching, me kin kasawihada minimin ni kapokon kan nan Iurop, South America, Aperika, oh Eisia; (3) To the Ends of the Earth, video wet wiawihda ni Kataman kalimeisek en Watchtower Bible School of Gilead and video kin kasalehda iaduwen doadoahk en misineri kan sewese doadoahk en kalohk en sampah pwon; (4) Jehovah’s Witnesses Stand Firm Against Nazi Assault, me kin koasoia iaduwen Sounkadehde kan kin eimah oh kehlail mendahki re lelong kalokolok sang Hitler; oh pil (5) Jehovah’s Witnesses—The Organization Behind the Name.
10 Wia Mehn Akadei kan Duwen Mihding kan: E kesempwal en kawehwe ong tohnsukuhl en Paipel kan me re anahne onop ni imwarail oh pil iang towehda mihding kan. (Sohn 6:45) Me kapw kan anahne wehwehki me ma re men kakairada ni pali ngehn re anahne wehwehki Pwuhk Sarawi oh pil sapwellimen Siohwa pwihn. Ihme kahrehda, sohte mehkot kak wiliandi iang towehda mihding kan. (Ipru 10:23-25) Ke anahne mwadang luhke aramaso en iang towehda mihding kan en mwomwohdiso. Ekei aramas kapw kan kin tepida iang towehda mihding kan mwohn re tepida arail onop en Paipel. Ahpw mehlel, pein kitail anahne wia mehn kalimeng mwahu ni atail kin iang mihding kan kaukaule.—Luk 6:40; Pilipai 3:17.
11 Kasaleong ih duwen dahme kin wiawi ansoun mihding kan pwe e pahn nsenamwahu ahnsou me e tepin iang mihding. Pwehki ekei aramas kin sohte men kohla kelepw wasa kan me kapw ong irail, ihme e pahn mwahu en iang tohnsukuhl en Paipelo ahnsou me e tepin iang mihding. E pahn perenki ma ke iang ih ahnsou me e pahn tuhwong mehteikan nan mwomwohdiso. Me keieu kesempwal iei en kasamwo ih.—Madiu 7:12; Pilipai 2:1-4.
12 Ni mwadang kangoange tohnsukuhlo en iang towehda kapokon en rahn tohrohr, de kapokon en circuit, de kapokon en district ahnsou me mie. Mwein ke kak luhke ih en iang kumwail seiloakla wasao.
13 Sewese Ih en Mwekidki Kalahngan nan Mongiong: Pwuhken Organized to Accomplish Our Ministry ni pali 92 kawehwehda: Ma ke kin kasalehda ahmw kalahnganki pwihn en Siohwa ni ahmw koasoi ong mehteikan, e pahn kamengeila arail kalahnganki pwihn en Siohwa oh re pahn kakairada mwadang ni arail men ese Siohwa.” Ahnsou koaros, koasoia dahme mwahu duwen mwomwohdiso, kaidehn soahng kan me suwed. (Melkahka 84:10; 133:1, 3b) Ni ahmw kin kapakap ahnsou me ke kin onop rehn aramas, ke kak koasoia duwen mwomwohdiso oh kesempwalpen tohnsukuhl en Paipel kan en miniminiong mwomwohdiso.—Episos 1:15-17.
14 Kitail mwahuki aramas kapw kan en kalaudehla arail kalahnganki pwihn en Siohwa oh perenki miniminiong irail.(1 Tim. 3:15; 1 Pit. 2:17; 5:9) Nin duwen Sounkadehdehn Siohwa kan, kitail en wia uwen me kitail kak en kahluwa tohnsukuhl kan en Mahsen en Koht ong sapwellimen Koht pwihn en Sounkadehdehn Siohwa kan.
[Blurb on page 3]
Tohnsukuhl en Paipel kan kin kakairada mwadang ahnsou me re kin pein kilang sapwellimen Siohwa pwihn
[Blurb on page 4]
Mwadang luhke tohnsukuhl en Paipel kan en iang towehda mihding kan