Kohpwahn Peidek

◼ Soangen kaweid dah kan me kitail pahn tehk kanaieng ahnsou me ke tuhwong ohl de pwutak kan (ma kowe emen sister) de ma ke tuhwong lih de serepein kan (ma kowe emen brother) ni ansoun kalohk de ihs me kitail kin iang ansoun kalohk?

Mie kahrepe mwahu en liki riatail brother oh sister kan oh kasikasik me irail pahn mwakelekel ni arail tiahk kan. Ahpw, kitail anahne tamataman me kitail mihmi nan sampah me inenen samin oh aramas kin wia nsenarail. Ahpw, mendahki kitail kin likih mehteikan, kitail anahne kasalehda tiahk me sohte pahn kauwehla mwaren Siohwa de sapwellime pwihn de dehr wia mehkot me sohte konehng. Kitail anahne kanaieng duwen soahng pwukat ahnsou me kitail kin iang doadoahk en kalohk.

Ni atail doadoahk en kalohk, ekei pak kitail kin tuhwong aramas me kin perenki rong. (Karasepe, mwein emen sister tuhwong emen ohl de pwutak, de emen brother tuhwong emen lih de serepein.) Ma ke kelepw ahnsou me ke tuhwong aramaso oh sohte emen likin aramaso mihmi nan ihmw, e pahn mwahu en kesihnendahte ni wenihmwo oh koasoiong irail oh dehr pidelong nan ihmwo. Ma aramaso uhdahn men rong, ke kak koasoanehdi emen en iang uhk pwurala de pwurehng pwurala ni ahnsou me irail tohnihmw teikan mihmi nan ihmw. Ma met sohte kak wiawi e pahn mwahu ma ke kak kihong emen sounkalohk me konehng. (Karasepe: ma emen sister tuhwong ohl de pwutak men me uhdahn men rong, e pahn konehng en padahkiong emen brother en pwurehng pwurala reh. De ma emen brother tuhwong emen lih de serepein me uhdahn men rong, e pahn konehng en padahkiong emen sister en pwurehng pwurala reh.) Met pil pahn pid duwen wia onop en Paipel rehn aramas akan.​—⁠Madiu 10:16.

Kitail pil anahne kanaieng ihs me kitail pahn iang ansoun kalohk. Ekei pak brother men oh sister men kak ehupene ansoun kalohk, ahpw e pahn mwahu ma met wiawi ni ahnsou me mie brother oh sister teikan mihmiseli rehra. Ahpw, ni mehlel, e sohte pahn konehng ma emen brother oh emen sister kalap ehupene ni doadoahk en kalohk, ihte ma brothero oh sistero pwopwoud. Ihme kahrehda, brothero me kihpeseng irail sounkalohk kan anahne doadoahngki eh loalokong ni e koasoanehdi ihs me pahn doadoahkpene, iangahki irail pwulopwul kan.

Ma kitail pahn doadoahngki atail loalokong, kitail sohte pahn wiahda mehkot me pahn “kahdsuwedih at kohwa doadoahk” ong pein kitail de mehteikan.​—⁠2 Kor. 6:⁠3.