Summer iei Ahnsou Mwahu en Kalohk
1 Ong pali moron en kitail, nan sounpwong kan en summer, kitail kak kalaudehla atail kalohki rongamwahu. Ni ahnsou me kowe oh ahmw peneinei wia amwail pilahn ong summer, ke kin wiahda mehn akadei ong kumwail koaros?—Episos 5:15, 16.
2 Wia doadoahk en auxiliary pioneer iei mehn akadei mwahu ong summer. Kommoal en sukuhl pahn kihong irail sounkalohk pwulopwul kan me saikinte pepdais arail ahnsou mwahu en ahneki peren me kin kohsang iang doadoahk en auxiliary pioneer. Irail kak luhke mehteikan en iang irail nan doadoahk wet, oh irail koaros kak sawaspene kalohki rongamwahu.—Rom 1:12.
3 Ekei pak, peneineio pwon kak iang doadoahk en auxiliary pioneer. Pwehki irail kin ahneki peren laud ni ahnsou me irail kin auxiliary pioneer, peneinei tohto wiahdaier arail mehn akadei me summer koaros, irail koaros pahn auxiliary pioneer.
4 Ma ke iang doadoahk en auxiliary pioneer nan sounpwong en summer kan, ke pahn diarada aramas tohto me ke kak pwurehng pwurala oh tepiada onop en Paipel rehrail. Pwehki met, ke kak iang doadoahk en regular pioneer nan September.
5 Edetehn ahmw irair en ahnsou wet sohte mweidong uhk en iang doadoahk en pioneer nan summer, ahpw ke kak kalaudehla ahmw awa kan ma ke kin iang kalohk. Ke kak koasoanehdi rehn irail pioneer kan en iang irail kalohk, kangoange irail, oh iang irail perenki doadoahk en kalohk.—Wiewia 20:35.