Kauwada Omw Mour En Pidada Papah Siohwa
1 Sises kin karasahiong irail kan me rongorong ah padahk duwehte soahngen sounkou ihmw riemen. Emen kin kauwada ele ah mour pohn paip en peikiong Krais oh kak powehdi melimel en uhwong kan oh kalokolok kan. Mehteio kokouda pohn piken sapeik roporop oh sohte kak kesikesihnte ni ahnsou me kapwunod kan lellong ih. (Madiu 7:24-27) Ni atail wie momour ni imwin koasoandi wet, kitail kin lellong melimel en uhwong tohto. Mwohtail kahn kamakam kowahlap kin kerekerendo. Kitail pahn kolokolte atail pwoson en dehr luwetala lao lel ni imwi? (Madiu 24:13, 21) Pasapengpen met kin poahsoanda laud pohn iaduwen kitail kin kakau atail mour ahnsouwet. Ihme kahrehda, e karuwaru en pein kalelepek rehtail, ‘I kin kauwada teng ahi mouren Kristian en papah lelepek ong Koht?’
2 Ia wehwehn en kauwada atail mour en pidada papah Siohwa? E kin wehwehki wiahkihla Siohwa en keieu nan atail mour. E pidada mwohneki Wehio mahs nan atail mour. E oarepene peikiong Koht nan wiewia kan koaros en atail mour en ehuehu rahn. Kitail anahne wia pein atail onop en Paipel, onop en peneinei, oh onop en mwomwohdiso oh atail kalohk sang nan mohngiongatail, wiahkihla mepwukat en keieu nan atail mour. (Ekl. 12:13; Madiu 6:33) Soahngen elen peik wet kin imwikihla pwoson ehu me poahsoanda teng, me sohte pahn pwupwudi ohla ma melimel en uhwong kin wiawihong.
3 E kin kaperen en kilang aramas rar kan ni likilik kauwada arail mour oh arail koapworopwor ong ahnsou kohkohdo en papah Koht, duwehte me Sises kin pil wia. (Sohn 4:34) Re kin idawehnla koasoandi en wiewia kan en wehio me kin sohte kin wukiwuk oh paiekihda kapai tohto pwehki met. Emen nohno kawehwehda iaduwen ih oh ah pwoudo pweida mwahu ni ara kekeirada neira pwutak riemen en papah Siohwa: “Se kin audehkihda aht mour padahk mehlel—ni aht kin iang towehda kapokon kan koaros, kaunopada oh iang towehda mihding kan, oh wiahkihla kalohk kisehn aht mour kaukaule.” Ah pwoudo kapataiong: “Padahk mehlel kaidehn ihte kisehn aht mour, pwe ih iei aht mour. Soahng teikan koaros kin wiawi pwehki padahk mehlel.” Ni ahl me duwehte met, komw pil wiahkihla papah Siohwa en keieu nan mour en omw peneinei?
4 Wiahda Koasoandi en Ehuehu Wihk me kak Doadoahk: Sapwellimen Siohwa pwihn kin sewese kitail en idawehnla koasoandi mwahu ngehnin ehu ni ah koasoanehdi mihding limau ehuehu wihk. Kristian kan me kin kauwada arail mour pwehn pidada kaudok ong Siohwa kin koasoanehdi arail wiewiahn doadoahk en mwohni oh wiewiahn peneinei ni ahl ehu pwe ren kak towehda mihding kesempwal pwukat koaros. Re sohte kin mweidohng ire kan me sohte nohn kesempwal en kauwe arail iang towehda mihding kaukaule.—Pilipai 1:10; Ipru 10:25.
5 Kristian mah kan kin pohnese me kaukaule mwenge ahnsou kan nan ehuehu rahn me kesempwal duwehte, en wiahda ehu koasoandi en pein onop oh onop en peneinei, iangahki kaunopada ong mihding kan. (Madiu 4:4) Ke kak koasoanehdi minit 15 lel minit 20 ehuehu rahn en pein onop? Kiho iei en dehr mweidohng soahng teikan en kauwehla omw ahnsoun onopo. Wiahkihla tiahk ehu me katapan. Met kin wehwehki me ke anahne pirida ehuehu nimenseng mwadangasang dahme ke kin wia rahn teio. Tohnpeneinei en Bethel nan sampah pwon me tohtohki meh 17,000 kin pirida mwadang nimensengie pwehn kosoiahpene iren rahn. Ni mehlel, pirida nimensengie kin wehwehki me kitail anahne en meirla mwadang nihpwong kan pwe kitail en kak tepiada rahn en mwuri kehlailehr oh kommoallahr.
6 Ma komwi emen tapwin peneinei, tiengla mwowe en pilahniada koasoanehdi en omw peneinei koasoandi en wiewia kan me pid papah Siohwa. Ekei peneinei kan kin wadekpene Paipel, Yearbook, de pwuhk en sawas en Paipel teikan ni arail kin komkommoal mwurin mwengehn ni soutik. Pahpa oh nohno tohto me kin kilang neirail seri kan laudla oh wiahla Kristian kan me kehlail ni pali ngehn kin koasoia me ehu ire me kin kahrehda ren pweida ni ahl wet iei tiahk en peneinei arail kin koasoanehdi ehu ni soutik ehuehu wihk me ren paiekihda werekpene ni pali ngehn. Emen soahngen pahpa me duwehte met koasoia: “I lemeleme me kekeiradahn pali ngehnin nait seri kan kin keieu kohsang aht onop en peneinei me se kin wia kaukaule Ni Esil kan, me tepida sounpar 30 samwalahro.” Nah seri silimen ko koaros papidaisla ni ahnsou me re tikitikte, oh mwuri irail meh silimeno iang doadoahk en kalohk kaukaule. Patohngete onop en peneinei, re kin praktis arail padahk kan me re pahn wia nan kalohk de pwais kan me re ahneki nan mihding oh peneineio kin pil paiekihda wiewia mwakelekel teikan.
7 Nan noumw koasoandi en ehuehu wihk, komw ‘isaneki doadoahngki amwail ahnsou mwahu kan’ en kalohkiseli Wehio? (Kolose 4:5) Pali moron en kitail kin kedirepw, mie atail pwukoahn peneinei oh mwomwohdiso me kitail anahne apwaliala. Ma kitail sohte kin wiahda koasoandi en iang doadoahk en kalohk oh katohnpadahk ehuehu wihk, e pahn mengei ong soahng teikan en kihsang ahnsoun wiewia kesempwal wet. Emen me anehki lapalahn wasahn apwalih kou koasoia: “Mpen 1944 I wehwehkihda me ihte ahl me I kak iang kalohk iei en koasoanehdi ehu rahn pwe I en iang kalohk. Lao lel rahn wet I kin kommoalsang doadoahk rahn ehu nan wihk ehu pwe I en iang kalohk.” Emen Kristian elder diarada me ma e pahn wiahda koasoandi en kalohk, met kin kak sewese ih en wiahda awahn kalohk 15 nan sounpwong ehu. Ma mie ah doadoahk teikan me sohte pid Wehio Rahn Kaunop, e kin koasoanehdi en wia doadoahko mwurin ah kalohk en nimenseng. Komwi oh omw peneinei kak koasoanehdi ehu rahn nan wihk koaros en iang kalohk, oh wiahkihla met kisehn elen amwail mour en pali ngehn?—Pilipai 3:16.
8 Kasawih Koasoandi en Omw Mour: Mie soahng kan me kin pelianda atail kauwada atail mour en papah Siohwa. Irair kan me kitail sohte kin kasik ele kakete kedirepwehla atail koasoandi me kitail pilahnida mwahu ong onop, mihding kan, oh kalohk. Oh atail imwintihti, Sehdan, pahn wia soahng koaros me e kakohng pwehn “kotehla atail ahl” oh kauwehla atail pilahn akan. (1 Des. 2:18; Episos 6:12, 13) Dehr mweidohng mehn kerempwa pwukat en kaluweteiuhkala, eri ke sohla idawehn omw koasoandi kan. Wekidala koasoandi kan me anahn pwe ken kak kapwaiada omw koasoandi en wiewia kan en papah Siohwa. Lamalam kehlail oh ngidingid me anahn pwehn kak kapwaiada dahme uhdahn kesempwal.
9 Kitail en dehr mweidohng manaman en sampah oh atail lamalam soh unsek en kapedolong wiewia soh ngehnin kan me kak tepiada kihsang atail ahnsou oh atail wiewia. Pein kasawih kitail me anahn, oh kitail en doadoahngki soahngen peidek duwehte: “Elen ahi mour mwomwen sohla pahrek? I tepiada kauwada ahi mour en pidada mehkan en sampah wet me pahn kasohrala? (1 Sohn 2:15-17) Ia uwen laud en ahnsou me I kin doadoahngkihla ong raparapahki nsenei, seiloakseli, mwadong, de mehn kamweit teikan—iangahki kilikilang T.V. de kilikilang audepen Internet—ah kapahrekiong ahnsou me I kin doadoahngkihla ong wiewiahn pali ngehn kan?’
10 Ma ke pehm me omw mour kedirepwkihla wiewia kan me sohte katepe, dahme ke pahn wia? Duwehte me Pohl kapakapki me rie kan en “kapwungala,” de “kainenla,” dahme ke soh pekih rehn Siohwa en sewese uhk en pwurehng mwohnekihla papah ih? (2 Korint 13:9, 11, ftn.) Eri lamalam kehlail ong kapwaiada dahme ke inoukihda oh wiahda wekidekla kan me anahn. (1 Korint 9:26, 27) Siohwa pahn ketin sewese uhk en dehr sohpeila ni palimaun de ni palimeing pwe ken papah lelepek ong ih.—Pil tehk Aiseia 30:20, 21.
11 Soupisengki Papahiong Koht ni Peren: Aramas rar kan kin ngoangkihla raparapahki nsenamwahu oh ahpw kin diarada me nindoken imwin arail mour kin kerekerendo, kepwe kan me re ngoangkihla raparapahki sohte kin wahdohng irail nsenamwahu poatopoat. E rasehng “pwakipwakih kisinieng.” (Ekl. 2:11) Ni pali teio, ni ahnsou me kitail kin mwohneki mahs Siohwa, ‘mwohneki Siohwa ahnsou koaros,’ kitail kin pehm nsenamwahu mehlel. (Mel. 16:8, 11, New World Translation) Met pahn wiawi pwehki Siohwa me kahrehda kitail en mie. (Kau. 4:11) Ma sohte ih, Sounkupwurehda Lapalapo, eri sohte kahrepen mour. Papah Siohwa kin audehkihda atail mour wiewia kan me katapan oh mie kahrepe, me kin katingih kitail iangahki meteikan ni ahl ehu me poatopoat, ehi, ni ahl ehu me pahn kohkohlahte.
12 E kesempwal kitail endehr itarkihlahte oh sohla ahneki pepehm en karuwaru me pid imwin koasoandi en sampahn Sehdan me mwadang kohkohdo. Atail mour en ehuehu rahn kin poahsoanda pohn atail kin kilangwohng ahnsou kohkohdo. Aramas kan ni mwein Noha, me sohte kin kamehlele me ehu nohlik lapalap pahn kohdo, re “sasairki,” oh kin poahsoanehda arail mour en ehuehu rahn pohn mehkan me re pein raparapahki—duwehte mwengemwenge, niminim, oh kapwopwoud—lao nohliko “kamwomwihrala koaruhsie.” (Madiu 24:37-39) Rahnwet, irail ko me kin poahsoanehda arail mour pohn sampah wet pahn kilang arail koapworopwor ong ahnsou kohkohdo kasohrala ni “rahn en Siohwa,” ohla me keieu laud me sohte kin wiawi sang mahs lel met me pahn lellong aramas.—2 Piter 3:10-12.
13 Eri, en kaukaulehte poahsoanehda omw mour pohn Koht ieiaso, Siohwa, oh wia kupwure. Sohte wasakis me ke kak kihong omw koapworopwor nan mour wet duwehte en kihong rehn Sounutuht likiliko, Siohwa. E sohte kin ketin likamw—e pahn kapwaiada sapwellime inou kan. (Taitus 1:2) E sohte kak sipalla—atail koapworopwor rehn Koht sohte kak salongala. (Apak. 1:12; 2 Tim. 1:12) Mouren peik oh pwoson me kitail kin kokou ahnsouwet kin wiahte tepin mour ehu me pahn wiawi kohkohlahte nan atail papah atail Koht pereno ni peren!—1 Tim. 1:11; 6:19.
[Blurb on page 3]
“Padahk mehlel kaidehn ihte kisehn aht mour, pwe ih iei aht mour. Soahng teikan koaros kin wiawi pwehki padahk mehlel.”