Tepida Onop en Paipel kan nan Kupwurki Brochure
1 Ripoht kan me se ale sang wasa koaros nan sampah kin kasalehda me brochure me oaralap koasoia: Dahme Koht Kupwurki Kitail en Wia? sewese aramas tohto en sukuhliki padahk mehlel. Ehu ehu week, aramas kid kid kei kin tepida onop Paipel nan Kupwurki brochure. Ke kin pweida ni ahmw kin tepida oh onop Paipel rehn aramas akan ni ahmw kin doadoahngki Kupwurki brochure?
2 Pali laud en kitail diarada me e mengei en kihla brochure, ahpw ekei kin nda me re sehse dahme re pahn nda ni arail pahn tepida onop Kupwurki brochure rehn aramas akan. Dahme meteikan diarada me kin mwahu pwe ren kak tepida onop Paipel rehn aramas ni arail doadoahngki Kupwurki brochure? Mwein ke pahn perenki iren sawas pwukat:
3 Idek Rehn Tohnihmw Ma Ke Kak Wiahda Kamwomwada en Onop: Ni ahnsou me ke tepin tuhwong aramaso de ni ahnsou me ke pwurehng pwurala reh, ke sohte pahn idek rehn tohnihmwo ma e men onop, ahpw ke kak idek reh ma ke kak wiahda kamwomwada pwehn kasalehda ia mwomwen kitail kin onop Paipel. Met pahn kihsang pepehm en pwunod me kin kak wiawi ma tohnihmw kin rong lepin lokaia: “onop.” Mwurin ahmw kamwomwada ia mwomwen kitail kin onop Paipel, ni ahmw pahn wia tepin ahmw koasoi, ke kak tepida onop reh.
4 E Kesempwal en Kaunopada: Atail ngoangki tepida onop Paipel rehn aramas kin poahsoanda pohn ma kitail onopada en wia met. Ma kitail kaunopada mwowe, met pahn sewese kitail en powehdi pepehm en pweiek ni atail kin men tepida onop Paipel rehn aramas. Ma kitail pahn praktis dahme kitail pahn nda pak tohto, kitail kak koahiekla ni atail pahn koasoi mwahu oh doadoahngki pein atail lokaia kan. Met pahn sewese kitail en dehr saloh oh tohnihmwo pahn pil kilang me kitail nsenamwahu oh sohte saloh.
5 Ni ahnsou me ke praktis, e pahn mwahu en tehk minit depe ahmw kamwomwada pwe ken kak ndaiong tohnihmwo me ahmw kamwomwada pahn ihte minit depe. Emen brother nda me mwurin e kin ndaiong tohnihmwo edeo, e kin nda: “I kohdo rehmw rahnwet pwehn kasalehda duwen aht koasoandi en onop Paipel ni sohte isepe. Kamwomwada wet pahn reireikihte minit limau. Ke kak mweidohng ie en wiahda kamwomwada erein minit limau?” Mwurin mwo, ke kak wiahda kamwomwada en Iren Mehn Kasukuhl 1 en Kupwurki brochure erein minit limau. Mehlel, ke kak wadek ekeite iren Paipel erein minit limau, ahpw ma ke pahn wia Iren Mehn Kasukuhl 1 pwon, tohnihmwo kak nda me e kilang ia mwomwen kitail kin onop. Mwurin mwo, ke kak ndaiong ih me ke pahn pwurodo oh wia Iren Mehn Kasukuhl 2, oh ke pahn wia erein minit 15 te.
6 Soangen padahk duwehte met kak pweida mwahu:
◼ “I men kasalehong komwi koasoandi en onop Paipel nan pein imwomw ni ahmw pahn doadoahngki brochure me oaralap koasoia: Dahme Koht Kupwurki Kitail en Wia? Aramas tohto diarada me ma irail pahn koasoanehdi minit te 15 nan ehu ehu wihk, erein wihk 16 irail kak diar pasapengpen peidek kesempwal tohto me pid duwen Pwuhk Sarawi.” Ni mwotomwot, kasalehda audepen brochure ni pali 2. Ni ahmw pahn pahkalahng Iren Mehn Kasukuhl 1, ke kak nda: “Ma ke pahn mweidohng ie minit limau, I kak kasalehda ia mwomwen koasoandi wet kin wiawi. Oaralap en Iren Mehn Kasukuhl 1 koasoia: ‘Iaduwen Komw Pahn Kak Diarada Dahme Koht Kupwurki Kitail en Wia.’ ” Mwurin mwo, wadek peidek siluh, oh kawehwe duwen nempe kan me kileldi mwurin peidek kan. Wadek parakrap 1, oh kasalehong tohnihmw iaduwen e kak diarada pasapengpen peideko. Mwurin mwo, ke kak idek rehn tohnihmwo ma e kak wadek parakrap 2. Mwurin mwo, ke kak nda: “Sang dahme ke wadek nan parakrap wet, iaduwen ke pahn sapeng peideko? [Pwurehng wadek peideko, oh mweidohng tohnihmw en sapeng.] Ke pahn kilang me mie iren Paipel kan me mihmi nan ehuehu parakrap. Ire pwukat kin sewese kitail en wehwehki duwen dahme Paipel kin mahsanih me pid peidek pwukat. Karasepe ieu, kitail wadek 2 Timoty 3:16, 17 oh kitail en kilang ma ahmw pasapeng pwung nin duwen ihs me ketikihong kitail Paipel.” Mwurin amwa pahn wadek parakrap 3, wadek peideko, oh wadek Sohn 17:3, kasalehong tohnihmwo duwen dahme e sukuhliki nan Iren Mehn Kasukuhl 1. Mwurin mwo, ke kak pahkalahng Iren Mehn Kasukuhl 2 oh wadek kaimwiseklahn peideko me koasoia, “Ahl riau dah kei kitail kak sukuhliki duwen Koht?” Mwurin mwo, ke kak idek reh: “Iahd me kita kak pwurehng tuhpene oh wia Iren Mehn Kasukuhl 2 erein minit te 15 oh ke kak ese duwen pasapengpen peidek wet?”
7 E kesempwal en kawehwe ni ahl me mengei en wehwehki oh pil kapinga tohnihmwo ahnsou koaros me e kin sapeng pwung. Ni ahnsou me ke pahn koasoanehdi pil ehu ahnsou en tuhpene, ke sohte pahn idek reh ma e men onopte, ahpw ke pahn kangoange ih en rapahki pasapengpen peidek kan nan iren mehn kasukuhlo me kumwa pahn wia wihk kohkohdo. Kehsehkin ih me ke kasikasik amwa pahn pwurehng tuhpene. Ma e apwal en koasoanehdi ahnsou me kak pwurehng tuhpene, ekei sounkalohk kan kin ndaiong tohnihmwo me re kak telephone irail pwehn pousehla ara onop. Oh pil, ke kak kangoange tohnihmw en nekidala mwahu brochure pwe ahnsou me kumwa pahn pwurehng tuhpene, tohnihmwo kak diar nah brochure oh pwurehng doadoahngki.
8 Nantihong Onop: Mehlel, irair ieu me kesempwal pwehn pweida mwahu iei onopada, ahpw pil ehu irair me kitail anahne ahneki iei en nantihong onop rehn aramas akan. Mehlel, padahkih iren mehn kasukuhl ehu nan minit kei kin kak apwal, eri kitail anahne nantihong praktis wia kamwomwada erein minit keite pwehn kak koahiek en wia met oh kamwomwadao pahn soandi mwahu oh wehwe mwahu. Nantihong en wiahda kamwomwadao rehn aramas koaros me ke pahn tuhwong nan doadoahk en kalohk ihmw-lel-ihmw, kalohk ni ahnsou sohte lipilipil oh pil kalohk ni ahmw doadoahngki telephone. Ma ke apwaliki tepida onop en Paipel rehn aramas akan, ken dehr mworusala. Ma kitail men pweida mwahu ni atail pahn tepida onop Paipel rehn aramas akan, kitail anahne nannanti oh nsenohki laud meteikan pwehn kak sewese irail en sukuhliki duwen padahk mehlel.—Kalesia 6:9.
9 Ni ahmw pahn doadoahngki iren sawas pwukat, ke kak alehdi kapai kan en sewese emen en kekeid ni elen mour soutuk, ni ahmw pahn tepida oh wia onop Paipel ni ahmw doadoahngki Kupwurki brochure.—Madiu 7:14.