Koakon En Peidek
◼ Ire dah kei pahn anahne kohda nan mihding en kalohk kan?
Kahrepen mihding en kalohk kan kin wiawi iei en sewese kitail en medemedewe duwen doadoahk me pahn wiawi mwurin mihdingo—iei doadoahk en kalohk. Ihme kahrehda, brother me pahn kihpeseng pwihn en kalohk pahn anahne kaunopada mwahu oh kihda sawas kan me konehng ong doadoahk en kalohk, oh mehkot me pahn kangoange sounkalohk kan. Ma iren rahn en rahno kin pid duwen doadoahk en kalohk, brothero kak wadek oh koasoia ireo ni ahnsou mwotomwot. Ahpw, mihdingo anahne en pid duwen doadoahk en kalohk, sewese koaros me pahn iang doadoahk en kalohk en kaunopada mwahu pwehn wia uwen me re kak nan doadoahk en kalohk rahno.—2 Tim. 4:5.
E kak koasoia duwen ire kesempwal konehng kan me kin kohsang Atail Doadoahk Ong Wehio pwehn kak kehsehkin koaros duwen mehnia pwuhk irail pahn kihla oh iaduwen irail pahn kak kihla pwuhk pwukat. Ni Rahn en Kihla Makisihn kan, brothero kak koasoanehdi pwehn mie kamwomwada sang artikel me oaralap koasoia “Dahme Kitail Kak Koasoia Duwen Makisihn kan.” Ni ahnsoun kihla pwuhk kan, brothero kak koasoia duwen tepin padahk ehu de riau me kohsang pwuhken Reasoning oh me kin konehng ong wasahn kalohk. Irair akan en kalohk kakete pwarada nan koasokoasoipene de kamwomwada kan duwehte dahme ke pahn wiaiong aramas akan me kin song en nda mehkot pwen kauhdi sang uhk en koasoia Paipel, oh iaduwen ahmw pahn kak kangoange ong emen en onop Paipel, de iaduwen ahmw pahn kak pwuralahng aramas emen me men rong.
Mihding en kalohk kan sohte pahn reirei sang minit 10 de 15, me wehwehki me soahng pwukat pahn wiawi erein minit 10 de 15: koasoanehdi pwihn en kalohk kan, padahkiong sounkalohk kan wasa me re pahn kalohk, oh kapakap. Ni ahnsou mihdingo nekier, irail koaros anahne ese ihs me re pahn iang oh pil iawasa re pahn kalohk, oh e pahn mwahu ma re pahn mwadang mwesel wasahn tuhpene ong kalohk oh kohla arail wasahn kalohk kan. Pwehki mihding wet me kin wiawi ni ahnsou mwotomwot, e kesempwal sounkalohk kan koaros en mwadangete kohdo ni wasahn tuhpene en kalohk. Ni ahnsou mihding en kalohk kin wiawi mwurinte mihding en mwomwohdiso ehu, duwehte Onop en Kahn Iroir, mihding en kalohk pahn uhdahn mwotomwot. Brothero sohte pahn wadek Iren Rahn, pwehki mihding ahpwtehn nek oh re aleier kangoang laud ni pali ngehn.
Elder kan pahn wiahda koasoandi en brother koahiek kan me pahn kihpeseng pwihn en kalohk. Ahpw, ma sohte brother kak kihpeseng pwihn en kalohk ehu rahn, elder kan kak pilada mehnia sister kan (sister kan me papidaislahr) kak kihpeseng pwihn en kalohk ma sohte brother men kak kihpeseng pwihn en kalohk. Sistero pahn mwohndi oh e pahn koasoia Iren Rahn de ekei ire kesempwal kak me pid kalohk, ahpw e pahn koasoi mwotomwot. E pahn pwaindi moange ahnsou me e pahn kihpeseng pwihn en kalohk.
Mihding en kalohk kan kin wia ahnsou mwahu kan en kangoange kitail oh sewese kitail en koahiekla nan doadoahk en kalohk. Ma brother kan me kin kihpeseng pwihn en kalohk pahn kaunopada mwahu, irail sounkalohk kan pahn uhdahn paiekihda.