Dehr Perki!
1 Ni ahmw pahn kaunopadahng kalohk sang ihmw-lel-ihmw, mwein wenihmw me pahn keieu wia kahpwal ong uhk iei pein ahmw wenihmw me wehwehki ahmw pepehm akan en ahmw sohte itar oh soh-koahiek en kalohk. Soangen pepehm pwukat kin kak kahrehong kitail en perki oh sohte men kalohk ong “aramas koaros” duwen padahk mehlel. (1 Tim. 2:4) Ahpw, kitail en dehr perki oh sohte men kalohk ong meteikan duwen Rongamwahu en Wehin Koht. Dahme kahrehda?
2 Rohng Wet Kohsang Siohwa: Siohwa kin doadoahngki Pwuhk Sarawi pwehn kawehwehong aramas akan sapwellime mahsen kan. Ni atail kin kalohkihong aramas akan rohng wet, kitail anahne tamataman me kitail ahneki sapwellimen Siohwa madamadau kan, kaidehn pein atail. (Rom 10:13-15) Ni ahnsou me aramas akan kin kahng rong duwen Rongamwahu en Wehio, ni mehlel, re soikala Siohwa. Ahpw, kitail en dehr nsensuwedla. Kitail en tamataman me irail me pahn rong oh mwekidki duwen Rongamwahuwo iei irail me men kilang wekidekla en irair en sampah oh irail me kin nsenohki arail anahn en pali ngehn.—Esek. 9:4; Madiu 5:3, 6.
3 Siohwa Kin Kahredohng Aramas Reh: Emen me kin kahng rong mahs kak wekila oh met men rong pwehki ah irair kan wekila oh pwehki e mwekidki dahme e rong. Ih ahnsou me Siohwa kak kasalehda sapwellime limpoak ong ih oh ‘kahredong aramaso reh.’ (Sohn 6:44, 65) Ni ahnsou me met kin wiawi, kitail anahne mweidohng Siohwa en doadoahngki kitail oh mweidong tohnleng kan en diar irail me men rong.—Kaud. 14:6.
4 Koht kin Kihong Kitail Sapwellime Ngehn Sarawi: Sapwellimen Siohwa ngehn sarawi kin sewese kitail en kalohk “ni eimah nin duwen manaman me kohsang Siohwa.” (Wiewia 14:1-3, NW) Ma kitail pahn tamataman me sapwellimen Siohwa manaman kehlail kin sewese kitail nan atail kalohk, kitail sohte pahn perki koasoia duwen padahk mehlel ong mehn mpatail, iengatail tohndoadoahk kan, iengatail tohnsukuhl akan, atail peneinei, aramas loalokong kan oh aramas kepwehpwe kan.
5 Sises Padahkiong Kitail Iaduwen Kitail Pahn Kalohk: Sises kin doadoahngki peidek kan me kin kahrehong aramas en medemedewe, karasaras kan me aramas kak wehwehki oh pil iren Paipel kan. E kawehwe duwen padahk mehlel ni ahl me mengei, kaperen en rong oh pil e kin kawehwe sang mohngiongih. Soangen kawehwe pwukat kin mwahute lel rahnwet. (1 Kor. 4:17) Irair akan nan atail wasahn kalohk kin wekpeseng, ahpw rohng duwen Rongamwahu en Wehio kin manaman oh kak sewese aramas wasa koaros nan sampah.
6 Kitail ahneki pwais kaselel pwe Siohwa kin doadoahngki kitail en sewese aramas ni ahl ehu me kesempwal oh tohrohr. Kitail en dehr perki! Kitail en eimah oh mweidohng Siohwa en “ketikihong kitail ahnsou mwahu en padahkihwei sapwellime mahseno” en Rongamwahuwo ong meteikan.—Kol. 4:2-4.