“Kisakis kan me Mih Rehn Ohl akan” kin Ngoangki Apwalih Sapwellimen Koht Sihpw
1 Ki sapwellime Ohl, Siohwa ketikihong kitail sawas mwahu ni E ketikihda “kisakis kan me mih rehn ohl akan”! (Episos 4:8, 11, 12) Re kin ahneki pwukoa tohto, iangahki apwalih sapwellimen Koht pelin sihpw. (1 Pit. 5:2, 3) Kitail koaros kin paiekihda koasoandi wet. Sohte lipilipil ma ekei nan mwomwohdiso kin lelohng kahpwal, de ekei me kapw nan mwomwohdiso, de ekei tepida luwetala ni pali ngehn, ohl pwukat kin nsenohki pali ngehn en irail koaros nan mwomwohdiso.—Pilipai 2:4; 1 Dese. 5:12-14.
2 Ni ahnsou me irair en sampah kin kahrehong koaros en masapwehkada, sounapwalih pwukat kin duwehte “wasahn ruksang kisinieng oh melimel.” Ni ahnsou me kitail kin nsensuwed oh pahtou oh anahne mehn kamweit, re kin kakommoaleikitailla, “rasehng piletik kansenamwahu kan me kin tangatang nan wasa karakar kan” de “mwetehn paipalap ehu nan sapwtehn.”—Aiseia 32:2.
3 Kangoange Irail me Solahr Kin Kalohk: Elder kan kin kangoange irail me sohte iang kalohk sounpwong ehu (irregular) oh pil irail me solahr iang kalohk erein sounpwong weneu (inactive), sewese irail en pwurehng iang kalohk nan mwomwohdiso. Elder kan kin mwemweitla rehrail oh kangoange irail (shepherding calls) oh pwehki met, irail tohto pwurehng kaukaule iang towehda mihding kan oh kekeirada ni pali ngehn oh pwurehng iang kalohk. Soangen nannanti kan me elder kan kin wia kin kasalehda duwen sapwellimen Siohwa epwel mwahu oh sapwellimen Sises Krais kaunda mwomwohdiso ahnsou wet. E wia mehn kahlemeng mwahu duwen soangen nsenoh me anahn ahnsou me emen sihpw kin tepida kohsang pelin sihpw de salongala.—Madiu 18:12-14; Sohn 10:16, 27-29.
4 Elder kan kin kilang kilel kan ahnsou me ekei tohnmwomwohdiso kin tepida luwetala ni pali ngehn. Sohte lipilipil me kin kasalehda me re nsensuwed oh pahtou, ma re solahr kin iang mihding kan koaros, de ma re solahr kin kalapw iang kalohk. Elder kan kin pil nsenohki irail me tepida alasang sampah ni arail likou oh kapwat de irail me tepida kauwe irail me kin mihmi nan mwomwohdiso. Ni arail kin nsenohki tohnmwomwohdiso kan oh kasalehda limpoak ong irail, sounapwalih kan kin kihda ‘pein [arail] mour’ pwehn sewese irail me luwetala ni pali ngehn en pwurehng kakehlail arail limpoak ong Siohwa.—1 Dese. 2:8.
5 Mahs, ekei Kristian inouda kan solahr kin miniminiong arail mwomwohdiso oh re solahr iang towehda mihding kan oh kalohk pwehki soumwahu de kahpwal en mwohni de kahpwal en peneinei me kin powehdi irail. Elder kan, ni madamadau en kangoang kaidehn kauwe, kin kak sewese irail me luwetala en kamehlele me Siohwa kin nsenohki sapwellime sihpw koaros oh E pahn kak sewese irail ni ahnsou apwal akan. (Mel. 55:22; 1 Pit. 5:7) Irail sounapwalih kan kin sewese tohnmwomwohdiso en wehwehki me—ma re pahn ‘keido mpen Koht, e pahn keiong mparail,’ oh ketikihong irail mehn kamweit oh kakommoalei irailla.—Seims 4:8; Mel. 23:3, 4.
6 Kesempwaliki Irail me Soumwahu oh Mahla: Irail sounapwalih limpoak kan kin pil kin nsenohki irail me aramas teikan sohte kin tehk. Nan ehu ehu mwomwohdiso, mie irail me soumwahu, mahla, irail me kin mihmi nan wasa kan me re kin apwalih me mah kan oh me soumwahu kan. Irail pwukat sohte kak kalapw iang kalohk pwe irair kan me re mihmi loale. Mwein re kin kalohk ihte ong irail me mwemweitla rehrail, soumwahu teikan, de irail me kin apwalih irail. Ahpw, mendahki met, sohte lipilipil dahme re kin wia—kitail kin kalahnganki. (Madiu 25:15) Mehnda ma re kak kalohk ihte minit 15, re pahn ripohtki met oh mwomwohdiso pahn wadek irail nin duwen sounkalohk kan me kin kalohk sounpwong koaros.
7 “Kisakis me mih rehn ohl akan” kin keieu nsenohki anahn en ngehn en riarail brother oh sister kan ahnsou wet—ahnsoun Kataman. E pahn wia ahnsou mwahu me elder kan pahn nantihong sewese irail koaros me luwetala ni pali ngehn en pwurehng pehm soangen peren oh meleilei me kin kohsang miniminiong mwomwohdiso! Kitail kin ahneki peren laud ahnsou me kitail kin kilang irail kan me “kisehn atail pwoson” iang towehda mihding kan oh iang kalohk, pwe soahng pwukat kin kasalehda me re pwoson meirong en tomw.—Kal. 6:10; Luk 15:4-7; Sohn 10:11, 14.