Peneinei kan me Kehlail ni Pali Ngehn—Iaduwen Met Kak Wiawi?
1 Kaping kin kohwong peneinei kan me kin ‘wia mwekid kan me kin kasalehda lelepek ong Koht nan pein arail peneinei kan.’ (1 Tim. 5:4) Ahpw, pwehki kasongosong tohto kin lelohng kitail oh mehpwukat kin kak kaluwetala atail pwoson, e pahn kesempwal ong peneinei kan en doadoahk laud pwehn kehlail ni pali ngehn ahnsou koaros. Iaduwen met kak wiawi?
2 Tapwin Peneinei kan en Kahlemengih Krais Ni Arail Kapwaiada Arail Pwukoah: Tapwin peneinei kan anahne kahlemengih Sises Krais ni arail kin kapwaiada arail pwukoah kan pwehn kakehlailih arail peneinei kan ni pali ngehn. Sises wia laud sang ihte kasalehda pak ehute sapwellime limpoak ong kitail ni e matkinkitailla, pwe e kin “kamwenge oh kanai” mwomwohdiso. (Episos 5:25-29) Pahpa oh nohno limpoak kan kin idawehn mehn kahlemeng mwahu wet ni arail kin apwalih mwahu anahn en pali ngehn en arail peneinei ehuehu rahn. Met kin wehwehki me re kin wia arail onop en peneinei ehuehu wihk, koasokoasoipene duwen soahng ngehnin me loal oh wehwe—oh wia met ahnsou me re kak, oh pil koasokoasoiapene kahpwal kan ahnsou me re kin pwarada.—Deud. 6:6, 7.
3 Nan Kalohk: Tohnpeneinei koaros anahne wehwehki me kalohk ong aramas teikan duwen Siohwa oh sapwellime kupwur kan kin kisehn atail kaudok. (Aiseia 43:10-12) Ma kumwail, pahpa oh nohno kan, mwahuki noumwail seri kan en wiahla Sounkadehdehn Siohwa kan me lelepek, kumwail anahne tepida mwadang kaunopada mohngiongarail ong kalohk. Koasoia duwen kahrepe kan me sounkalohk kan anahne tohnmetei nan kalohk oh pil kalohk ehuehu wihk. (Madiu 22:37-39) Mwurin mwo, kumwail pahpa oh nohno kan kak koasoanehdi en iang irail nan kalohk kaukaule.
4 Sewese ahmw peneinei en kalahnganki oh kesempwalili doadoahk en kalohk ni ahmw pahn koasoanehdi ahnsou nan amwail onop en peneinei ehuehu wihk pwehn kaunopada oh praktis amwail padahk kan. Sewese emenemen noumw seri kan nan kalohk, oh ahmw sawas pahn poahsoankihda arail sounpahr oh arail koahiek. Mwurin amwa ehu nan kalohk, koasoia iaduwen re pein kilang sapwellimen Siohwa kamwahu sewese irail. Koasoia ekei ekspiriens kan me kak kakehlailih arail pwoson. Ma peneinei kan kak “song ia uwen mwahu en kalahngan en Kauno,” re pahn karanih Siohwa oh met pahn sewese irail en soikeweisang “soahng suwed koaros.”—1 Pit. 2:1-3.
5 Nan Mihding kan: E kin inenen mwahu en kilang tohnpeneinei sawaspene pwehn kaukaule iang towehda mihding kan koaros, keieu ahnsou me emen irail kin pwang, nsensuwed, de pehm me e toutoukihlahr pwukoah tohto! Emen sister pwulopwul koasoia: “Ni ahnsou me ahi pahpa kin pwurodo sang doadoahk, e kin inenen pwang. Eri, I kin kangoange ih ni ahi kin ehukihong ih ire kesempwal ehu me re pahn koasoia ahnsoun mihding ni soutik, oh mwurin mwo, e men iang mihdingo. Oh pil, ahnsou me I kin pwang, e pil kin kangoange ie en iang mihding en rahno.”—Ipru 10:24, 25.
6 Miniminpene nan Doadoahk oh pil Mwadong: E pahn mwahu ma tohnpeneinei kan pahn miniminpene nan doadoahk, duwehte doadoahk nan ihmw oh likin ihmw. Re pil kak koasoanehdi ahnsou ong mwadong oh mehn kamweit me konehng Kristian. Kohla wasahkis ong piknik, hiking, mwadong, oh seiloak pwehn kilang peneinei kan de kompoakpahrail kan kin kihong peneinei arail ahnsou mwahu en miniminpene oh tamanda soangen ahnsou mwahu kan pahn kaperen.—Ekl. 3:4.
7 Peneinei en Kristian kan pahn kak powehdi kahpwal kan me kin kak kauwehla arail pali ngehn. Ni arail pahn karanih Siohwa, re pahn pehm duwen kehl me E kin ketikihda.—Episos 6:10.