Kumwail me Pwulopwul kan—Kumwail en Wiahda Poahsoan Mwahu Ong Ahnsou Kohkohdo
1. Dahme kahrehda Kristian pwulopwul kan anahneki kakehlailihala arail pwoson?
1 Dahme kin keieu kesempwal nan ahmw madamadau? Dahme ke kin kalapw medemedewe? Ke kin keieu medemedewe duwen soahng kan me pid ahnsou wet, de ke kin keieu medemedewe duwen ahnsou kohkohdo oh dahme Koht inoukihong kitail? (Madiu 6:24, 31-33; Luk 8:14) Pwoson kehlail kin anahn pwehn kak mwekidki inou en Koht kan, nin duwen dahme Eipraam oh Moses kasalehda. (Ipru 11:8-10, 24-26) Iaduwen ke kak kakehlailihala ahmw pwoson oh wiahda “poahsoan mwahu ong ahnsou kohkohdo”?—1 Tim. 6:19.
2. Dahme kitail kak sukuhliki sang mehn kahlemeng en Nanmwarki Sosaia?
2 Rapahki Siohwa: Ma ke kin ahneki koasoandi mwahu en onop oh kalohk ong ahmw peneinei, met kin wia mehkot mwahu. Ahpw, ken dehr lemeleme me soangen koasoandi pwukat pahn kahrehda kowe oh ahmw peneinei en ahneki pwoson kehlail. Pwehn diar “loalokong me pid duwen Koht,” ke anahne pein rapahki Siohwa. (Lepin Padahk 2:3-5; 1 Kronikel 28:9) Nanmwarki pwulopwul Sosaia wia met. Mendahki e tikida nan irair me sohte mwahu ong eh pali ngehn, “e tepida rapahki Koht en Depit, eh pahpa kahlap” sang ni ahnsou me e sounpahr 14.—2 Kronikel 34:3.
3. Iaduwen Kristian pwulopwul kan rahnwet kak rapahki Siohwa?
3 Iaduwen ke kak rapahki Siohwa? Ni ahmw pahn tehk kanahieng dahme ke kin kamehlele oh ‘tehk mwahu ma pein kowe kin kamehlele’ me met padahk mehlel. (Rom 12:2) Karasepe ehu, ke kak kawehwehda dahme Pwuhk Sarawi mahsanih duwen nta oh ke kak pil kasalehda sang nan Pwuhk Sarawi iaduwen kitail ese me Wehin Koht tepida kakaun nanleng nan pahr 1914? Sukuhliki “loalokong pwung en padahk mehlel” kin wia mehkot kesempwal ma ke men wiahda poahsoan mwahu en ahnsou kohkohdo.—1 Tim. 2:3, 4.
4. Iaduwen irail sounkalohk me saikinte papidaisla kan ahr kak kasalehda me irail kekeirada?
4 Pwehki Sosaia rapahki Koht, e pweida mwahu nan ah mour. Mwohn e lel sounpahr 20, e kin eimah ni e kihsang nan sahpwo kaudok likamw akan. (2 Kronikel 34:3-7) Duwehte kumwail, amwail kekeirada ni pali ngehn pahn sansal sang amwail wiewia kan. (1 Tim. 4:15) Ma ke wia sounkalohk men me saikinte papidais, ke kak nantihong koahiekla nan kalohk. Ken dehr itarkihte kihla pwuhk, brochure, makisihn oh tract kan. Ken nantihong doadoahngki noumw Paipel, kawehwe ong aramas akan, oh sewese irail me kin kasalehda me irail men rong. (Rom 12:7) Met pahn sewese iuk en kekeirada ni pali ngehn.
5. Dahme irail Kristian kan me papidaislahr kak wia pwehn kalaudehla arail ahnsoun papah Siohwa?
5 Kihong Siohwa Dahme Keieu Mwahu: Ni ahnsou me ke pahn inoukihong Siohwa ahmw mour oh papidaisla, ke kin wia sounpapah me alehdi kamanaman sang Koht. (2 Kor. 3:5, 6) Met pahn ritingadahng uhk soangen doadoahk kan me ke kak papah Siohwa “full-time.” Ekei doadoahk pwukat iei Regular Pioneer, doadoahk nan Bethel, doadoahk en misineri, oh pil iang doadoahk rehn irail me kin wiahda Kingdom Hall kapw kan nan sampah pwon. Ke kak pil kalaudehla ahmw papah Siohwa ni ahmw pahn sukuhliki lokaia kapw oh keseula wasakis me ke kak kalohk oh doadoahngki lokaiao me ke sukuhlikihdi de ese.
6. Iaduwen kitail koaros kak wiahda poahsoan mwahu ong ahnsou kohkohdo?
6 Mehlel, kaidehn koaros kak iang wia soangen pwais pwukat, ahpw emen emen kitail kak kihong Siohwa dahme keieu mwahu rehtail. (Madiu 22:37) Sohte lipilipil soangen irair en mour dah me ke ahneki, ke kak wiahki ahmw papah Siohwa me keieu kesempwal nan ahmw mour. (Mel. 16:5) Ni ahmw pahn wia met, ke kak wiahda ahmw poahsoan en mwahu ong ahnsou kohkohdo.