Koakon En Peidek
◼ Soangen sawaspen Paipel dah kan me pahn mihmi nan Theocratic Ministry Sukuhl library?
Sawaspen Paipel tohto me wiawihda ong kamwahupen sapwellimen Koht aramas akan. Pwehki sounkalohk tohto sohte kin naineki pwuhk, brochure oh makisihn pwukat koaros, Theocratic Ministry Sukuhl library nan Kingdom Hall kin sawaskihda pwuhk pwukat ong research. Ihme kahrehda, library anahne audaudki kawehwe kan en Paipel tohto, pwuhk, brochure, makisihn oh tract kapw kan me Society wiahda, copy kan en Atail Doadoahk Ong Wehio, bound volume kan en Watchtower oh Awake! makisihn kan, oh pil Watch Tower Publications Indexes. Oh pil, e pahn mwahu ma diksineri mwahu me lepin lokaia kan me aramas kin doadoahngki rahnwet kin mihmi loale pahn pil mihmi nan library. Ma kak, encyclopedia kan, atlas kan, de pwuhken reference me pid grammar (iaduwen aramas kin kihpene arail lokaia) oh pwuhk kan me pid poadoapoad en aramas pahn pil mihmi nan library. Ahpw, dahme keieu kesempwal iei met: pwuhk kan me “ladu lelepek oh loalokong” wiahda en mihmi nan library nan Kingdom Hall.—Madiu 24:45.
Ekei pak, sounkalohk kan kin nda me ekei pwuhk kan me sohte konehng mihmi nan arail Theocratic Ministry Sukuhl library. E sohte pahn konehng ma pwuhk kan me sohte mehlel (fictional books, novels), pwuhk en sampah, pwuhk kan me kin kasalehda duwen madamadau en aramas de pwuhk en wunani kan en mihmi nan library. Theocratic Ministry Sukuhl library pahn audaudkihte pwuhk kan me pahn sewese tohnmwomwohdiso en kekeirada ni pali ngehn.—1 Tim. 4:15.
Sounapwalih en Theocratic Ministry Sukuhl pwukoahki library, ahpw e kak pekihda pil emen brother en sewese ih en apwalih library. E pahn anahne tehk me pwuhk, brochure, makisihn kapw koaros me Society ahpwtehn wiahda mihmi nan library. Eden mwomwohdiso me naineki pwuhk, brochure oh makisihn kapw kan pahn kileldi (inside cover). Pak ehu nan sounpahr ehu, e pahn mwahu en tehk ma pwuhk pwukat ohla oh anahne wiliali, de ma emen anahne kamwahuwihala pwuhk pwukat me mihmi nan library.
Koaros kak sawaspene apwalih library. Koaros pahn anahne kanahieng ni arail pahn doadoahngki pwuhk kan. Pahpa oh nohno kan pahn tehk me neirail seri kan sohte pahn mwadongki pwuhk kan de kauwehla pwuhk kan (ntingihda de lainih loale). E pahn mwahu ma mie kilel nan library me pahn katamankin koaros me sohte me kak wahsang pwuhk kan me mihmi nan library.
Pwehki mwomwohdiso kapw kan tohtohla, ekei library kan sohte audaudki pwuhk kan koaros. Ekei sounkalohk kan me naineki pwuhk mering kan kin kak kisekisehki mwomwohdiso kan neirail pwuhk kan. Elder kan kak oaht bound volume kan en Watchtower oh Awake! makisihn en mahs ko. Ni ahl pwukat, Theocratic Ministry Sukuhl library pahn wia sawas laud ong koaros en rapahki takai kesempwal me rir nan Mahsen en Koht, me pahn ketikihong kitail loalokong, erpit oh dehdehki.—Lepin Padahk 2:4-6.