Koasoiong Meteikan Duwen Tiahk en Mehla kan
1 Nan wasa tohto, tiahk en sahpw me pid mehla kin sohte pwungiong dahme Paipel kin kasalehda duwen irair en me melahr akan. Emen sister lelepek nan Samoa lelohng uhwong laud sang rehn ah peneinei ni ah wiahda koasoandi en nah pwutako ah mehla, ahpw sang kangoang en tohnmwomwohdiso, e tengediong me mehlelo. Ahl me irail brother ko koasoanehdi ong mehlao uhdahn weksang en mehn Samoa tiahk, ahpw irail kaun en kousapw ako pwuriamweikihla sawas me Sounkadehde ko wia ong peneineio mwohn oh mwurin mehlao. Irail kaun en kousapw ako uhdahn mwekidki duwen mwomwen koasoandi en mehlao me kahrehiong re kasalehda ni sansal oh pwungkihda ren wekidala arail tiahk en mehla ong Faa-Molimau a Ieova (Dahme Sounkadehdehn Siohwa kin wia).
2 Mwomwen atail kin koasoanehdi koasoandi en mehla kan mwein kakete pil duwehte met. Ahpw, e sohte kin wia mehkot mengei en koasoiong tohn atail peneinei oh mehn mpatail kan duwen tiahk en mehla kan. Ekei aramas kin ahneki pepehm kehlail kan ong ire wet pwehki padahk likamw akan me pid irair en me mehlahr akan. Soahng siluh pahn kak sewese iuk ken kak kamwekid ahn aramas madamadau pwe ren kak medemedewe: (1) kaunopada mwahu, (2) koahiek en kak koasoia ire ehu de riau sang nan Paipel, oh (3) doadoahngki mwahu sawaspen Paipel kan me Society wiahda.
3 Pwehn sewese aramas emen en wehwehki duwen irair en me mehlahr akan, ke kak nda:
◼ “Mie pak me ke medemedewe dahme kin wiawiong irail me kitail poakohng me mehlahr? [Mweidohng en sapeng.] Paipel kak sewese kitail wehwehkihla peidek kan me kitail kin ahneki me pid mehla. [Wadek Eklesiasdes 9:5, 10.] Dahme met kin padahkiong kitail duwen irair en me melahr akan? [Mweidohng en sapeng.] Menlau tehk iaduwen brochure wet kin kawehwehda duwen irair en me melahr akan. [Luhke tohnihmw en wadek nan brochure me oaralap koasoia “Ke Kak Kompoakepahnki Koht!” nan Iren Mehn Kasukuhl 12, parakrap 1.] Ke lemeleme e kesempwal en idawehn dahme Paipel kin padahki? [Mweidohng en sapeng.] Ni ahnsou me I pahn pwurodo, kita kak doula koasoia dahme Paipel kasalehda duwen irail me kitail poakohng me melahr akan.”
4 Iet pil ehu ahl ke kak song en tepida koasoiong ahmw peneinei de mehn mpomw:
◼ “Ke lemeleme kitail pahn kak pwurehng kilang irail me kitail poakohng me melahr akan? [Mweidohng en sapeng.] Tehk duwen ahnsou kaperen me brochure wet koasoia. [Luhke aramaso en wadek nan brochure en “Kompoakepahnki Koht!” nan Iren Mehn Kasukuhl 12, parakrap 3.] I men kasalehiong komwi duwen inou ieu me Sises wiahda me pid ah pahn kamourada me melahr akan. [Wadek Sohn 5:28, 29] Soahng tohto nan Paipel kin kasalehda me pid irail me kitail poakohng me melahr akan. Ni ahi pahn pwurodo, kita kak doula nan ata koasoiapene duwen ire wet.”
5 Brochure en “Kompoakepahnki Koht!” kin wia mehn sawas konehng ong kawehwehiong aramas duwen tiahk en mehla kan. Ma ke kihong ahmw peneinei de kompoakpahmw, rapahki ahl akan en doulahte nan amwa koasoia ireo. (1 Timoty 4:16) Pilada ehu de riau ire kan sang brochure oh pil kaunopada ehu iren Paipel pwehn ehukihong ih. Karasepe, ke kak nda:
◼ “Rahn teio kita koasoia duwen dahme kin wiawiong irail me kitail poakohng me melahr akan. Paipel padahkiong kitail me irail memeir ni arail mehla, oh irail sohte kak rong, kilang de lokaia. Dahme ke lemeleme, met pahn kamwekid mwomwen atail kin wia koasoandi en mehla kan? [Mweidohng en sapeng.] Kita tehk dahme brochure wet koasoia. [Luhke tohnihmw en wadek “Kompoakepahnki Koht!” brochure, Iren Mehn Kasukuhl 12, parakrap 2.] Ke kak medewehda ehu tiahk en mehla me aramas akan kin wia pwehn kadeke irail me mehlahr kan? [Mweidohng en sapeng.] E kin kasalehda me soangen tiahk pwukat kin kansensuwedih Koht pwehki e poahsoankihda ehu en Sehdan likamw akan. Ke ese mehnia likamw met? [Wadek keieun sentence nan parakrap 4.] Likamw wet ntingdi nan Senesis 3:4. [Wadek.] Luhwen Iren Mehn Kasukuhl 12 kin kawehwehda duwen sapwellimen Koht pepehm ni aramas akan kin iang pidada tiahk kan me kin pid me melahr akan.”
6 Pwehn sewese kitail en koasoia duwen mehla oh tiahk en mehla kan, Society ketikihda sawaspen Paipel kan me kak sair mohngiong en aramas emen me kin ni mehlel rapahki padahk mehlel. (Ipru 4:12) Brochure en “Kompoakepahnki Koht!” oh tract kan me oaralap koasoia “Koapworopwor Dahieu Mie Ong Kompoakpahmw Melahr akan?” oh “Mie Ngenomw Me Sohte Kak Mehla?” kak wia mehn sawas mwahu en tepida koasoiong aramas akan. Sounkadehde tohto diarada me e wia sawas en kihong mehn sawaspen Paipel pwukat ong irail kan me kin iang towehda mehla kan.
7 Tiahk en sahpw me pid mehla kin wia kisehn “mehkan me kin tengla” rehn aramas tohto me irail Kristian mehlel kan anahne kasalehda me irail sohte pwungki. (2 Korint 10:4, 5) Ni ahnsou me kitail kin lelepek utungada padahk kan en Paipel, kitail kin kihong Siohwa, Samatail nanleng, lingan oh wahu. Ni ahnsowohte, kitail kin kihong ahnsou ong irail akan me men sukuhliki duwen me mehlelo oh kapitirailsang pwunod oh tiahk kan me sohte poahsoanda pohn Pwuhk Sarawi.—Sohn 8:32.