Ke Kak Tepida Onop Paipel Doadoahngki Pwuhken Loalokong?
1. Dahme kin pidada en tepida onop en Paipel ni ahnsou me kitail tepin tuhwong tohnihmw akan?
1 Kitail anahne pehmitikiong tepida onop en Paipel kan ni ahnsou me kitail tepin tuhwong tohnihmw akan ni doadoahngki pwuhken Loalokong. Dahme kin pidada en wia met? Likin kihla pwuhko, kitail anahne koasoia ekei parakrap kan rehn tohnihmw oh koasoanehdi en pousehla atail koasoi ni ahnsou me kitail pahn pwurala reh.
2. Iaduwen kitail kak doadoahngki pali 4 oh 5 en pwuhken Loalokong pwehn tepida onop en Paipel?
2 Mwein Kitail pahn tepida ni doadoahngki kilel ni pali 4 oh 5 en pwuhko oh nda, “Ma ke ale luhk en mour nan soangen wasa kaselel duwehte met, ke pahn perenki iang?” Rong kanahieng dahme tohnihmw pahn nda. Ma tohnihmwo pahn kasalehda me e men rong, wadek dahme Paipel mahsanih nan Sohn 17:3. Mwuri ke kak nda, “Paipel kin padahkiong kitail me Koht poakohng aramas akan oh e kupwurki irail en mour kohkohlahte ni nsenamwahu pohn sampah wet.” Ke kak pousehla amwa koasoi ni doadoahngki tepin parakrap en Irelaud 1.
3. (a) Ma mie pak ke doadoahngki padahk ehu duwehte padahko me kilelehdi nan parakrap 3, iaduwen tohnihmw mwekidki padahk wet? (b) Soangen padahk dah kan likin padahko me kilelehdi nan parakrap wet ke kin doadoahngki pwehn tepida onop en Paipel ni ahnsou me ke tepin tuhwong tohnihmw?
3 Padahk kan me kak mweidong kitail en mwadang tepida koasoipene duwen Paipel ni doadoahngki pwuhko kak pweida mwahu. Pwehki pali laud en aramas akan mie kompoakparail de arail peneinei me mehlahr, mwein ke pahn idek rehn tohnihmw, “Mie pak ke medemedewe ma ke pahn kak pwurehng tuhwong kompoakepahmw me mehlahr?” Mweidong tohnihmw en sapeng, oh wadek Sohn 5:28, 29. Pahkalahng pwuhken Loalokong ong kilel kan nan pali 85 oh 86, oh wadek nting kan me mihmi limwahn kilelo. Tepida koasoipene sang parakrap 11-13 nan pali 83 oh 84. Ni ahmw koasoia ire pwukat, ke tepidahr onop en Paipel.
4. Ma kitail tepida onop ni ahnsou me kitail tepin tuhwong tohnihmw, iaduwen kitail kak koasoanehdi pwehn pousehla onopo?
4 Koasoanehdi en Pwurehng Pwurala: Ni ahnsou me ke pahn kaimwisekla tepin ahmw onop, ke kak koasoanehdi en pousehla amwa onop oh nda: “Ni minit keite, kita sukuhlikier dahme Paipel padahngki duwen ire kesempwal wet. Ni ahnsou me I pwurodo, kita kak koasoipene duwen [kihda ehu peidek me kumwa pahn koasoipene]. I kak pwurodo soangen ahnsou duwehte met nan wihk kohkohdo?” Wiahda koasoandi sansal pwehn pwurehng pwurala reh, oh dehr manokehla en uhdahn pwurala reh. (Madiu 5:37) Ma onopo tepida kaukaule wiawi, ke kak koasoanehdi en onop sang tepin pwuhko lel imwin pwuhko.
5. Dahme kitail anahne wia ma tohnihmw sohte men tepida onop Paipel ni ahnsou me kitail tepin tuhwong ih?
5 Ma ke kihla pwuhken Loalokong ahpw tohnihmwo sohte men tepida onop ahnsowo, ken pwurehng pwurala reh pwehn tepida onop en Paipel.