“Iawasa I kak Diarada Ahnsou?”
1 Ih komplein me pali laud en kitail kin ahneki, pwehki atail mour kin dirkihla soangen koasoandi tohto kan. Mie me kin nda me ahnsou iei mehkot me keieu kesempwal oh mehkot me kitail kak ahneki ahnsoukiste. Eri, iawasa kitail kak diarada ahnsou ong mehkan me uhdahn kesempwal, duwehte wadawad oh onop en Mahsen en Koht?—Pilipai 1:10.
2 Me keieu kesempwal iei, kaidehn en song en rapahki ahnsou laud, ahpw en pilada dahme kitail men wia nan ahnsou me kitail ahneki. Kitail koaros ahneki awa 168 nan ehu wihk, oh kitail kin doadoahngki awa 100 samwa ong meir oh doadoahk. Eri, iaduwen kitail kak doadoahngki luwen awa kan ni ahl me keieu konehng? Pwuhken Episos 5:15-17 kin kangoange kitail en “dehr weweid duwehte aramas me loalopwon kan, ahpw kitail duwehte me loalokong kan. Kitail isaneki ahnsou mwahu koaros . . . , song rapahki dahme Siohwa ketin kupwukupwure kitail en kin wia.” Met kin kasalehda anahnepen doadoahngki ahnsou mwahu koaros en wia soahng kan me Siohwa mahsanih me kesempwal.
3 Sises karasahiong atail ahnsou ong mwehin Noha. (Luk 17:26, 27) Aramas akan ahnsowo kin soupisengki wiewia oh koasoandi kan en arail mour ehuehu rahn. Ahpw, Noha koasoanehdi ah ahnsou en kauwada warihmw kalaimwun oh kalohk. (Ipru 11:7; 2 Piter 2:5) Iaduwen e wia met? Ni ah kin mwohnki kupwuren Koht mahs oh peikiong ih ni ah “kapwaiada mehkoaros me Koht ketin mahsanih.”—Senesis 6:22.
4 Dahme Anahne Wiawi Mahs? Sises mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Madiu 4:4) Wihk koaros, kitail kin ale “kisin tungoal [ni pali ngehn] ni ahnsou me konehng.” (Luk 12:42) Met wehwehki me kitail anahne koasoanehdi koasoandi en pein wia atail wadawad oh onop pwehn uhdahn paiekihda. Pwehki kitail kalahnganki mwengehn ngehn, kitail sohte kin wiahki mwenge wet duwehte soangen mwenge me kitail kin kang ni karuwaru. Ni pali teio, atail kalahngan kin kamwekid kitail en doadoahngki ahnsou laud en onop oh perenki mehkan me pid pali ngehn.
5 En ale mwengehn ngehn kak kahluwalahng mour soutuk. (Sohn 17:3) E warohng en mih nan wasa me keieu kesempwal nan atail koasoandi en ehuehu rahn. Iaduwen, kitail kak diarada ahnsou ong wadawad en Paipel ehuehu rahn oh kaunopada ong mihding kan en Kristian? Ehi, kitail kak. Kitail eri pahn ale “kating laud” me kohsang en ese oh wia kupwuren Koht.—Melkahka 19:7-11.