Mehn Kadehde Ieu en Pwoson Kehlail!
1. Soangen kahpwal dah kan me Sises kohpada?
1 Wahnpoaron ko rong kanahieng dahme Sises mahsanih duwen eh pahn ketier oh kaimwiseklahn koasoandien mehkan. Kahpwal kan pahn pwarada ong tohnsampah—mahwen, lehk lapalap, rerrer en sahpw, soumwahu lusulus. Mwuri, Sises mahsanih me tohn wehi koaros pahn kailongki sapwellime tohnpadahk kan, pangirailla pwe irail en lokolok, oh kamakamala. Soukohp likamw akan pahn pwarada oh pitiehdi me tohto. Limpoak en me tohto pahn tikitikla.
2. Dahme kahrehda e kapwuriamwei me rongamwahu kin lohkseli wasa koaros?
2 Pwehki irail rong soahng kahpwal wet, wahnpoaron ko pwuriamweila mwuhr ni en Sises mahsanih me rongamwahu en Wehin Koht pahn lohkseli wasa koaros nin sampah. (Mad. 24:3-14) Rahnwet kitail kilang pweidahn kokohp kapwuriamwei wet. Mendahki kitail momour ni ahnsou keper ehu, Sounkadehdehn Siohwa kan kin ngoangki kalohki rongamwahu. Weksang sampah ehu me limpoak en me tohto tikitikla, atail limpoak wia lalaudla. Mendahki “tohn wehi koaros” kailongki kitail, kitail kin kalohk nan wehi kan koaros.
3. Mehnia nempe kan nan ripoht en sampah pwon me ke kilang me kangoange iuk?
3 Ia uwen kangoang en kousapahlih doadoahk en Sounkadehdehn Siohwa kan ong pahr me ahpwtehn nek me mi nan ripoht en pali 3 lel 6! Erein sounpar 16 koaros leledo met, irail doadoahk daulih awa lik pwehn wia doadoahk en kalohk oh katohnpadahk. Met iei mehn kadehde me Sounkadehdehn Siohwa kan ahneki pwoson kehlail! Mie kekeirda en persent 5.8 ni nempe en pioneer kan, persent 3.1 ni sounkalohk kan, oh persent 4.4 ni onop Paipel kan. Irail me papidais kan kohda persent 20.1 sang pahr en kalohk me ahpwtehn nek. E kaperen en kilang me kereniong aramas isirar kin papah Siohwa ni lelepek—me keieu tohto nan poadopoad en aramas! Nin duwen omwi kin kasawih ripoht kan, dahme ke kilang me uhdahn kangoange uhk?
4. Kahpwal dah kan emen ohl powehdi ahnsou e nannanti en papidaisla?
4 Mendahki nempe pwukat inenen laud, kitail en dehr manokehla me met wilian aramas kan me kadehdehda arail pwoson. Medewehla ehu karasepe. Guillermo tikida nan Bolivia. Ipwidi nan pahr 1935, e doadoahk ni mwetuwel en coca sangete ni ahnsou me e sounpar duwau. Sang ni eh seri, e kin kang tehn tuhkehn coca pwehn saledek sang paisuwed en doadoahk apwal pwukat. Mwuhr e kamamsakau oh simoak sika. Ni ahnsou me e tepida onop dahme Siohwa kupwurki en wia, Guillermo uhdihsang simoak oh mwuri uhdihsang kamamsakau. Apwal me keieu laud iei uhdihsang tiahk en kang tehn tuhkehn coca me e kin wia erein eh mour. E kin kapakap ahnsou koaros oh kin powehdi tiahk wet. E maiauda sang tiahk suwed, oh e papidaislahr. E nda: “Met ei pepehm mwakelekel oh uhdahn peren.”
5. Dahme ke anahne en wia?
5 Siohwa uhdahn kin ketin nsenohki aramas. E kupwurki koaros en koluhla oh wiliakapwala. (2 Pit. 3:9) Ih me kitail pil men irail en wia. Mohngiongitail en kamwakid kitail en wia uwen me kitail kak pwehn pousehlahte sewese aramas kan me mohngiong mehlel en esehla oh limpoakohng Siohwa duwehte kitail.