Koakon En Peidek

◼ Iaduwen, e konehng Sounkadehdehn Siohwa kan en alehdi sawas de epwel en palien wini sang ni imwen wini de wasahn apwalih me mah kan me pelien lamalam ehu kin katanga?

Soangsoangen pelien lamalam akan kin katanga imwen wini kan de wasahn apwalih me mah kan me kin kihda sawas de epwel en palien wini. Pak tohto, soangen wasa pwukat kin wiawihda pwehn kihda sawas oh epwel ong palien wini ah kaidehn pwehn utung Papilon Lapalap. (Kaud. 18:2, 4) Ele pelien lamalam ehu tapihada soangen wasa pwukat pwehn wia elen pesines me pahn wiahda mwohni. Nan rahn pwukat, ekei imwen wini kan kin doadoahngkihte eden pelien lamalam kan pwehki pelien lamalam me tapihada, ahpw ekei kin doadoahngki eden pelien lamalam pwehki mie irail kaun en pelien lamalam kan me kin katanga pali laud en doadoahk kan.

Ma emen Sounkadehdehn Siohwa kan pahn anahne ale sawas sang ni imwen wini de wasahn apwalih me mah kan, e anahne pein wiahda eh pilipil ma iei e pahn ale sawas de epwel sang wasa ehu me pidada palien sarawi de soh. Ele kadeikpen loalen emen pahn mweidada ih en ale sawas sang soangen wasa pwukat ah en emen sohte pahn mweidada. (1 Tim. 1:5) Ele mie soangen irair kan me pahn kamwakid en emen pilipil, oh e pahn mwahu ma kitail tehkpene irair pwukat.

Karasepe ehu, ele ihte imwen wini de wasahn apwalih me mah me mie de karanih ahmw wasa iei me kin doadoahngki eden pelien lamalam. De ele ih wasao me kin kihda epwel me mwahu de me ahneki dipwisou en doadoahk kan me anahn. Ele imwen wini wet me doadoahngki eden sarawi iei ihte imwen wini me kak kihda soangen wiepen sawas en wini ehu, de ihte wasa me mie toahkte de sounpwal me kak kihda epwel me anahn. Pil ehu, ekei pak imwen wini kan me kin doadoahngki eden sarawi kin wauneki omw madamadau nin duwen Kristian men me pid ahmw en doadoahngki nta, ahpw ekei imwen wini kan wasao sohte kin. Eri mepwukat iei ekei ire kan me ke anahne medemedewe oh pein pilada mehnia imwen wini me ke pahn kohla ie.

Ma ke pilada ken repen sawas sang imwen wini de wasahn apwalih me mah me doadoahngki eden sarawi, ele ke kak kilangwohng isais me ke wia nin duwen isais ehu me wiawi pwehki sapis de sawas me kohwong uhk. Ele ke kak kilangwohng irair wet nin duwen elen pesines ehu me sarawi ehu kin katanga kahrehda isais me ke wia sohte wehwehki me ke utung kaudok likamw ahpw e wia isepen sawas me kohwong uhk. Kahrehda ihte me ke wia iei pwain pweinen dipwisou ehu de sapis ehu.

Ni mehlel, nin duwen Kristian emen, ke anahne tehkada mwahu pwe ken dehr iang pidada nan tiahk en kaudok likamw. Oh ke sohte pahn iang doadoahngki daidel kan me duwehte “Pahdere” de “Lih Kadek,” ong irail kan me kin doadoahk de pwarek wasao. (Mad. 23:9) Ke anahne tehk mwahu pwe ken kak kasalehda me ke sohte kohla pwehn utung arail kaudok ahpw ihte kahrepen ahmw kohla iei pwe ken ale sawas de epwel en palien wini.

Ni ahnsou me ke kin kapidelong nan soangen imwen wini wet, ke anahne padahkihong irail me kowe emen Sounkadehdehn Siohwa oh me ke men irail elder en ahmw mwomwohdiso en pwarek uhk. Met pahn kahrehiong uhk en koapworopworki me elder kan pahn sewese iuk kakehle ahmw nanpwungmwahu rehn Koht ahnsou me konehng erein ahmw pahn mihmi nan imwen winio.—1 Des. 5:14.

Peneinei kan me iang padahk mehlel, elder kan, oh tohnmwomwohdiso anahne sewese irail brother oh sister mah kan me kin mih nan wasahn apwalih me mah pwehn apwalih ire kan me pid duwen arail kaudok ong Siohwa, eri mehlel wasa kan me palien sarawi kin katanga. Ma kitail pahn nsenohki oh wia met, e pahn inenen wia kangoang laud ong irail me mah pwuko oh pereirailsang irail en dehr iang pidada tiahk en kaudok kan, kasarawi kan, oh wiewia en sarawi teikan me soangen wasa pwukat ele pahn kin wia.

Ni ahn emen pahn kin medemedewe soangen ire pwukat, e kak pein wiahda eh pilipil me pid mehnia imwen wini de wasahn apwalih me mah me e pahn kohla ale sawas ie.—Kal. 6:5.