Lokaiahn Kaping Kin Kakehlailih Kitail
1 Kisin serepeino sengiseng idek rehn eh nohno, “I sohte wia seri mwahu rahnwet?” Eh nohno pwuriamweikihla eh peideko. Mendahki e kilang uwen nah serepeino nannanti en wia mwahu rahno pwon, e sohte kasalehda lokaiahn kaping ong ih. Ahn serepeino sengiseng kin wia mehn kataman ong kitail koaros—mah oh pwulopwul—kin anahne kaping. Kitail kakehlailih mehn mpatail kan ni atail kin kasalehda kaping ong soahng mwahu kan me re kin wia?
2 En Dehr Koledihsang Kihda Kaping: Nin duwen tiahk en Micronesia, me tohto pehm me kihda kaping pahn kahrehiong neirail seri kan oh meteikan en pohnmwahso, kahrehiong irail en mwomwehda me re lapalap sang meteikan nan peneinei. Kitail pein idek, “I kin ‘kahlemengih wiewia kan en sampah wet,’ sang ni ei sohte kihong kaping ong nei seri kan oh meteikan?”—Rom 12:2.
3 Ia uwen mwahu en alasang kahlemeng en samatail limpoak nanleng sang idawehn tiahk en irail me sohte kin papah Siohwa! (Wadek Eksodus 23:2 oh Episos 5:1) Sises pil kin kapinga meteikan. Ni en Sises koasoia duwen sapwellime tohnpadahk Nadaniel, e mahsanih, “Iet uhdahn ohl mehlel en Israel men, me sohte kin widing!” (Sohn 1:47) Kitail kak alasang kahlemeng en Sises oh seme Siohwa ni en dehr koledihsang kihda kaping ong neitail seri kan oh riatail brother oh sister kan.
4 Iangatail Kristian kan kihong kitail kahrepe tohto en kapinga irail. Elder kan, ministerial servant kan, oh pioneer kan kin doadoahk laud pwehn kapwaiada arail pwukoa kan. Pahpa oh nohno me lemmwiki Koht kin wia uwen arail kak kakairada neirail seri kan ni ahl en Siohwa kan. (Ep. 6:4) Kristian pwulopwul kan kin nannanti en pelian “irair en sampah.” (1 Kor. 2:12, NW) Me tohto kin papah Siohwa ni lelepek mendahki mahla, soumwahu en paliwar kan, de kahpwal teikan. (2 Kor. 12:7) Irail pwukat warohng en ale kaping. Kitail pohnese arail nannanti oh kin kihong kaping?
5 Sang nan Mohngiong: Pwehn uhdahn wia mehn kakehl, kaping anahne kohsang mohngiong. Soangen kaping kamehlelehiong riatail brother oh sister kan me kitail anahne irail oh sewese kitail en pil kerenpene. Ke kin kihda pein ahmw kaping tohrohr ong emen rahn pwukat? (Ep. 4:29) Ni atail kasukuhlih pein kitail en kilang irair mwahu en meteikan, mohngiongitail pahn mwekidki en kihda kaping. Kitail en kadek kihda kaping mehlel, pwe kitail wehwehki me “meid kaperen diar mahsen pwung ni ahnsou me konehng!”—Lep. Pad. 15:23.