Sounkalohk kan Anahne Kapakap
1. Dahme anahn pwehn pweida nan atail kalohk?
1 Kitail sohte kak pein pweida nan doadoahk en kalohk. Siohwa kin ketikihong kitail kehl en wia doadoahk wet. (2 Kor. 4:7) E kin ketin doadoahngki tohnleng kan pwehn sewese kitail rapahkihda irail kan me rasehng sihpw. (Kaud. 14:6, 7) Siohwa me kin ketin kahrehiong weren padahk mehlel me kitail kin padokedi oh kalamwuri en pweida. (1 Kor. 3:6, 9) Ia uwen kesempwal ong Kristian sounkalohk kan en likih Samatail nanleng ni arail kin kapakap!
2. Ia ekei soahng kan me kitail kak kapakapki?
2 Ong Pein Kitail: Kitail anahne kapakap ehuehu ahnsou me kitail kin kalohk. (Ep. 6:18) Ia ekei soahng kan me kitail anahne kapakapki? Kitail kak kapakapki kitail en ahneki madamadau pwung duwen atail wasahn kalohk oh kapakapki kitail en eimah. (Wiewia 4:29) Kitail kak peki rehn Siohwa en kahluwa kitaillahng irail akan me ahneki mohngiong mwahu me kitail kak onop Paipel rehrail. Ma tohnihmwo idek ehu peidek, kitail kak mwadang kapakap nan kapehditail oh peki rehn Siohwa en ketin sewese kitail en sapeng irail ni konehng. (Neh. 2:4) Kitail pil kak peki erpit pwehn keieu kesempwalki doadoahk en kalohk. (Seims 1:5) Patehng met, Siohwa kin kupwurki ni atail kin kasalehda kalahngan ong kapai en wia sapwellime sounkalohk kei.—Kol. 3:15.
3. Ia duwen atail kapakapki meteikan eh kin sewese doadoahk en kalohk?
3 Ong Meteikan: Kitail pil anahne “kapakapki emenemen.” Kitail kak nda eden iengetail sounkalohk kan ma e konehng. (Seims 5:16; Wiewia 12:5) Ia duwe, kahpwal en paliwar kin katikala omw kak iang wia doadoahk en kalohk? Eri, kapakapki iengomw sounkalohk kan me ahneki roson mwahu. Dehr mwamwahliki dahme omw kapakap kak wiahiong meteikan! E pil konehng en kapakapki kaunen wehi kan pwe irail en kak mweidohng doadoahk en kalohk en wiawi, pwe riatail kan “en kak momourki mour meleilei oh popohl.”—1 Tim. 2:1, 2.
4. Dahme kahrehda kitail en poadidiong kapakap?
4 Kalohki rongamwahwo nin sampah pwon wia doadoahk laud ehu. Ma kitail “poadidiong kapakap,” kitail pahn pweida nan doadoahk wet sang sapwellimen Siohwa sawas.—Rom 12:12.