Ke Kak Iang Kalohk Rahn Sarawi kan?
1. Dahme kitail kak sukuhlki sang wiewiahn Pohl oh ienge kan nan Pilipai?
1 Rahno rahnen Sapad, rahn ehu me mehn Suhs nan Pilipai kin kommoal. Pohl oh ienge ko kohla nan kahnimwo ni ehu arail mwemweit en misineri. Sohte me pahn kauwe irail ma re pil kommoaldihsang arail doadoahk en kalohk rahno. Ahpw, Pohl oh ienge ko wehwehki me mehn Suhs kan pahn pokonpene likin kahnimwo pwehn kapakap, kahrehda re isaneki ahnsowo pwehn kalohk ong irail. Ia uwen Pohl oh ienge ko ar peren laud ni ahnsou me Lidia oh eh peneinei pwon rong irail oh papidaisla! (Wiewia 16:13-15) Pwehki me tohto kin kommoal ni Rahn Sarawi kan, ke sou doadoahngki ekis ahnsou nan rahno pwehn kalohk ong irail?
2. Kahpwal dah kan me sapwellimen Siohwa pwihn kin powehdi me kahrehda kitail kak kalohk ni Rahn Sarawi oh sohte me uhwong?
2 Nannanti Pwehn Kalohk Rahn Sarawi: Erein pahr 1927, sapwellimen Siohwa pwihn kin ale kangoang en doadoahngki ekis ahnsou pwehn kalohk ni Rahn Sarawi kan koaros. Met mwadangete imwikihla uhwong laud. Me tohto selidi nan Amerika pwehki ar kauwehla kosonned en Sapad ong Rahn Sarawi, kauwe onepek oh netinet ni soh laisin. Ahpw sapwellimen Siohwa pwihn sohte uhdi sang kalohk. Nan pahr 1930 samwa, irail koasoanehdi pwihn kei, sounkalohk kan sang mwomwohdiso teikan pwehn tuhpene oh kalohk nan wasahn kalohk kan. Ekei pak, ni ahnsou me sounkalohk kan kin selidi, irail nohn tohto kahrehda kaun akan sohte kin kak kauhdi irail. Ke kin kalahnganki tounmetei me riatail kan kin wiahda pwe kitail en kak kalohk Rahn Sarawi oh sohte me uhwong kitail?
3. Dahme kahrehda Rahn Sarawi kin wia rahn mwahu ehu ong kalohk?
3 Rahn Mwahu Ehu ong Kalohk: Aramas tohto kin mi nan imwarail oh sohte doadoahk ni Rahn Sarawi. Pali laud en ahnsou, re kin komkommoal. Ekei me kin kohla sarawi kin men koasoia duwen Koht rahno. Ma mie atail mihting ni Rahn Sarawi, kitail kin onopadahr duwehte atail pahn kohla kalohk. Eri, ke sou koasoanehdi ken iang kalohk mwohn de mwurin mihting? Ma anahn, kaunopada kisin mwenge oh wahda.
4. Soangen peren dah me kitail kak ahneki ma kitail doadoahngki ekis ahnsou ni Rahn Sarawi pwehn iang kalohk?
4 Ma kitail kin doadoahngki ekis ahnsou ni Rahn Sarawi pwehn kalohk, e pahn mihete atail ahnsou en kommoal me kitail anahne. Oh kitail pahn diar nsenamwahu ni atail kommoal pwehki atail iang doadoahk sarawi wet. (Lep. Pad. 19:23) Kitail pil kakete ahneki peren me kohsang atail diar emen me duwehte Lidia!