Medewe oh Mwekidki Ire Mehlel kan
1. Ia duwen ire mehlel kan ar kin weksang kosonned kan?
1 Paipel audaudki ire mehlel kan. Ia duwen ire mehlel kan ar kin weksang kosonned kan? Ire mehlel kan kin wia utupen kosonned kan.
2. (a) Dahme kahrehda doadoahngki ire mehlel kan kin apwal sang idawehnte kosonned kan? (b) Dahme kahrehda kitail anahne nantihong medemedewe ire mehlel kan a kaidehn rapahki kosonned kan?
2 “Mahsen en atail Koht” kin pwurepwurehng kangoange kitail en medewe oh mwekidki ire mehlel kan de kaweid kan en Paipel. Wehwehkihla oh kapwaiada ire mehlel kan en Paipel kin apwal sang idawehnte kosonned kan. Nin duwen aramas soh unsek kei, mwein kitail sohte men nantihong medemedewe duwen ire mehlel kan. Ele kitail kin men doadoahngki kosonned kan pwehki e mengei en idawehn ni ahnsou me kitail anahne wiahda pilipil ehu de mi nan kahpwal ehu. Ekei pak, kitail kin rapahki kaweid sang rehn Kristian koahiek men, mwein elder men, oh kasik en ale kosonned ehu me pahn kadoadoahk ongete atail irairo. Ahpw Paipel oh sawaspen Paipel kan ele sohte kin kihda kosonned sansal ehu, oh mehnda ma ehu kosonned kohwong kitail, ele e sohte pahn kadoadoahk ahnsou koaros oh nan soangen irair koaros.
3. (a) Dahme kahrehda kitail kak koasoia me Sosep kin mwekidki ire mehlel kan sang eh doadoahngki kosonned kan? (b) Ia duwen atail kak alasang ahn Sosep mehn kahlemeng?
3 Nna song medewehla ahn Sosep mehn kahlemeng ni eh sohte dukiong en wendi rehn ahn Podipar pwoudo. Mendahki Siohwa saikinte ketin ntingihedi kosonned ehu me pid dehr kamwahl oh saikinte ketikihda kalokepen wendi rehn ahn emen tohrohr pwoud, Sosep wehwehki kesempwalpen loalopwoat nan sapwellimen Koht koasoandi en pwopwoud. (Sen. 2:24; 12:18-20) Kitail kak kilang sang dahme e sapengki me ire mehlel wet kin kamwakid ih laud: “Ia duwen ei pahn wiahda soangen sapwung laud wet, oh dipikihda mwohn Koht?”—Sen. 39:9.
4. Ia duwen atail kak doadoahngki ire mehlel kan en perehsang kitail soangen kaudok me sohte katepe de wiahte mwohmw?
4 Atail ese oh kapwaiada ire mehlel kan kin perehsang kitail soangen kaudok me sohte katepe oh wiahte mwohmw. Mie wekpeseng en kapwaiada ire mehlel kan oh peikiongete kosonned pisetik kan. Ni atail kin kapwaiada ire mehlel de kaweid kan en Paipel, kitail sohte pahn mourki (de idingkihong meteikan ren mourki) soangen mour me diren kosonned pisetik oh kakos kan ong dahme emen anahne wia oh dehr wia me daulih dahme Paipel padahngki. Kitail pahn nsenohki laud kahrepen atail poakohng oh peikiong Koht a kaidehn mwomwehdahte wia kaudok.—Luk 11:42.