Koakon en Peidek
◼ Dahme kitail anahne medemedewe mwahu ma kitail men ekei de koaros atail kepwe kan en kolahng sapwellimen Siohwa pwihn ni ahnsou me kitail mehla?
Ni ahnsou me emen mehla, e solahr ahneki manaman pohn eh kepwe kan koaros. (Ekl. 9:5, 6) Kahrehda me tohto kin wiahda doaropwe me manaman me kawehwehda arail koasoandi kan ong dahme irail men en wiawihong arail kepwe kan koaros. (2 Nan. 20:1) Doaropwe manaman wet pil kin kasalehda ihs me e piladahr en apwalih koasoandi ko koaros me kileldi. Aramas me e pilada anahne ahneki manaman sang mwoalen kopwung de palien kosonned pwehn kak wia met (Trustee de Executor). Nan sahpw tohto, palien kosonned pahn koasoanehdi ahn aramas mehla men eh kepwe kan ma e sohte wiahda soangen doaropwe wet. Ihme kahrehda, ma kitail men wiahda koasoandi oaritik kan me pid atail kepwe kan, karasepe, ma ekei de koaros en kolahng sapwellimen Siohwa pwihn, e kesempwal kitail en wiahda doaropwe manaman ehu me koasoi mepwukat oh kitail en pilada ni keneinei ihs me pahn apwalih koasoandi pwukat.
Aramas me pahn apwalih koasoandi ko (trustee de executor) ahneki pwukoa kesempwal ehu. Me pid uwen laud en mwohni de kepwe kan, eh koasoanehdi de nehkpeseng soahng pwukat kak pidada soahng pisetik tohto oh pil kak doadoahngki ahnsou laud. Patehng met, palien koperment kin kalapw ahneki koasoandi kan me kitail anahne peikiong. Kaidehn koaros nan mwomwohdiso kak wia emen me pahn apwalih kehkehlik en emen me mehla. Aramas me kitail pilada anahne en wia emen me kitail ese me koahiek, likilik oh men kapwaiada atail koasoandi kan.
Ma emen Peki Rehmw Ken Wia Aramaso me Pahn Apwalih de Koasoanehdi eh Kepwe kan: Ma emen pahn peki rehmw ma ke pahn men apwalih eh kepwe kan, keieu medemedewe mwahu ma ke kak wia met, oh kapakap oh koasoanehdi ma ke kak kapwaiada pwukoa wet. (Luk 14:28-32) Mwurin aramaso mehla, ke anahne kaesehki koaros me ederail kileldi en iang sohsohki oh ahneki kepwe kan. Eri, ni ahnsou me ke alehdi pwuhng ken wia met, ke pwukoahki en kihpeseng kepwe kan nin duwen pwuhng en kosonned oh idawehnte dahme ntingdi nan doaropweo. Me pwukoahki wia met anahne pohnese me mehnda ma kepwe kan laud de tikitik, e sohte kak wiahiong nsene pohn kepwe pwukat. Kepwe kan me koasoandi nin duwen pwung en kosonned me kohwohng Sounkadehdehn Siohwa kan en doadoahngki wialahr ahn sapwellimen Siohwa pwihn.—Luk 16:10; 21:1-4.