I Anahne Iang Kohla ni Mehla?
1. (a) Pilipil apwal dahieu me kitail kak lelohng, oh dahme kitail pahn keieu kesempwalki? (b) Peidek dah kan me kitail anahne pein idek rehtail?
1 Iang de sohte iang kohla ni mehlahn emen me sohte iang padahk mehlel kak wia pilipil apwal ehu. Pwehki kitail men wiahda pilipil ehu me pahn kaperenda Siohwa, e pahn mwahu en pein idek rehtail: ‘Dahme Siohwa pahn kupwurki ien wia? Mehnia kaweid kan en Paipel me pahn kamwakid ei pilipil? Ia duwen ei kak kolokol nsenmwakelekel oh sohte kauwehla ahi oh ahn meteikan nanpwungmwahu rehn Siohwa?’
2. (a) Ma tiahk en mehla ehu kin utung padahk likamw, ia pahn atail madamadau ong iang wia tiahk wet? (b) Keper dahieu me kitail kak lelohng ni atail kin mi nanpwungen pokon ehu?
2 Tehk Kaweid en Paipel kan: Ehu iren kaweid en Paipel me kitail kak doadoahngki iei me mi nan 2 Korint 6:14-18. Iretikitik 17 mahsanih: “Kaun-o ketin mahsanih, ‘Kumwail uhdahn pahn pweieksang rehrail, oh tohrohreweisang irail. Kumwail dehr sair mehkot samin rehrail.’” Kahrehda kitail en dehr iang wia tiahk en mehla kan me kin pid padahk likamw kan me dene ngenen me mehla kak lidere de sewese me momour kan. Mehnda ma kitail medemedewe ma kitail pahn kohlahte ni mehlao, kitail anahne idek rehtail, ‘Ei pahn mi nanpwungen pokon ehu me koaros kin wiewia tiahk en mehla me kohsang padahk likamw pahn kahrehda eh apwal ong ie en dehr iang wia tiahk pwukat?’ Ma kitail sohte medewe en wia met ahpw irair en ahnsowo me kahrehda kitail mwekidki atail pepehm oh iang wia kaudok likamw, met pil kin wehwehki salelepek ong Siohwa Koht, mehkot me kitail sohte mwahn men wia. Ma kitail pilada en iang kohla, e kesempwal kitail en koasoanehdier me kitail sohte pahn iang wia mehkot me pahn kasohwauwi Siohwa.
3. Ire dah kan me kitail anahne tehk pwehn dehr kadipekelekele meteikan?
3 Keriau en iren kaweid mi nan 1 Korint 10:32: “Nan amwail mour kumwail dehr wia mehkot me kak wiahla kahrepen dihp rehn mehn Suhs akan de mehn liki kan, de rehn tohn mwomwohdisohn Koht.” Ia duwen ma kitail iang wia tiahk en mehla ehu me sohte nohn sansal ma e sapwung, ahpw nan madamadau en meteikan, e kin pid masak me mehla kan? Soahng kan me kitail wia kak kadipekelekele irail kan me ese dahme Sounkadehdehn Siohwa kan kin kamehlele oh padahngki me pid me melahr akan? Atail iangete mi mwo kak kauwehla nsenmwakelekel en tohnmwomwohdiso de tohn atail wasahn kousoan? Ahpw ia duwen, atail sohte kin iang kohla ni mehlahn kisehtail men me sohte iang mi nan padahk mehlel, pahn kadipekelekele tohn atail kousoano?—Mad. 18:6; 1 Kor. 8:12, 13.
4. Dahme kahrehda kolokol nsenmwakelekel mwohn silangin Siohwa uhdahn kesempwal?
4 Kesiluh en iren kaweid mi nan Rom 14:22, 23, me ekei wasa nan ireo mahsanih: “Meid pai aramas me nan kapehde sohte kin pepehm me e sapwung ni eh kin wia mehkot me pein ih pehm me pwung!” Eri, tehk kanahieng dahme imwilahn omw pilipil pahn wiahiong pein omw nsenmwakelekel!
5. (a) Ihs me pahn wiahda pilipil ma emen en kohla de soh ni mehlahn emen me sohte mi nan padahk mehlel? (b) Ia duwen atail pahn kak wiahda pilipil pwung ni soangen irair pwukat?
5 Pein Omw Pwukoa: Mwurin omw tehk kanahieng oh kapakapki kaweid kan en Paipel, emenemen Kristian uhdahn pahn wiahda pein eh pilipil ma e pahn kohla ni mehla ieu de soh, mehnda ma e mi nan imwen sarawi, nan imwen emen de wasahn seridi. (Kal. 6:5) Emenemen Kristian pahn pein pwukoahki dahme e koasoanehdi oh pil pein ih me pahn pwukoahki imwin eh pilipil. (Rom 14:12) Tiahk en aramas kak wia lidip oh mehn kerempwa ong kitail. Ahpw, kadeikpen loalatail me kaiahnkihda Mahsen en Koht pahn sewese kitail en wiahda pilipil pwung.—Mel. 119:105.