“Kadehdehda ni Unsek”
1. Kahlemeng mwahu dah me wahnpoaron Pohl kihda nan doadoahk en kalohk?
1 “Wia omw pwais ni unsek.” (2 Tim. 4:5, Byington) Wahnpoaron Pohl sohte suwedki kihong Timoty kaweid wet. Ni mehlel, nanpwungen pahr 47 oh 56, Pohl kanekehla kesilipak en eh seiloak en misineri. Nan pwuhken Wiewia kan, e pwurepwurehng kasalehda me Pohl kin “kadehdehda ni unsek.” (Wiewia 23:11; 28:23, NW) Ia duwen atail kak wia met nan atail ahnsou?
2. Ia duwen atail kak kadehde ni unsek ni atail kin kalohk ihmw lel ihmw?
2 Kalohk Ihmw Lel Ihmw: Pwehn nantihong lel tohnihmw koaros me saikinte rong rongamwahwo, ele kitail anahne tuhwong aramas ni ahnsou kan me wekpeseng nan ehu rahn. Pwe kitail en tuhwong ohl en ihmwo, ele kitail anahne kalohkla ni soutik de ni imwin wihk kan. Kitail anahne nantihong lokaiahiong emen ni ehuehu wasahn kousoan oh pil pwurepwurehng pwurala ni ihmw kan me sohte towe. Ahpw ia duwen ma ke sohte tuhwong emen? Mwein ehu kisinlikou de omw delepwohnla pahn kak imwila mwahu.
3. Soangen ahnsou mwahu dah me ke ahneki en kalohk ni wasa me aramas kin pokonpene ie de ahnsou sohte lipilipil?
3 Wasa Aramas Kin Pokonpene Ie oh Ahnsou Sohte Lipilipil: Sapwellimen Siohwa ladu kan rahnpwukat kin kasalehda duwen “loalokong” ong koaros me pahn rong. Ekei pak met kin wiawi “nanial kan” de “wasa koaros me aramas kin pokonpene ie.” (Lep. Pad. 1:20, 21) Ni atail kin wiewia atail pwukoa kan nan ehuehu rahn, kitail kin taman en kalohk? Aramas kak nda me kitail kin ‘mweidohng atail ahnsou koaros ong kalohkiseli mahseno’? (Wiewia 18:5) Ma ei, eri kitail kin kapwaiada atail pwais en “kadehde [“kadehdehda ni unsek,” NW]” rongamwahwo.—Wiewia 10:42; 17:17; 20:20, 21, 24.
4. Ia duwen kapakap oh doudouloale ara kin sewese kitail en kadehde ni unsek?
4 Ahpw ekei pak, pwehki atail luwet kan de atail kin namenek, mwein kitail kin pweiek en kalohk. Siohwa uhdahn kin ketin mwahngih atail sou itar kan. (Mel. 103:14) Ahpw mendahki ma irair pwukat kin pwarada, kitail kak kapakap oh peki reh pwehn kalohk ni eimah. (Wiewia 4:29, 31) Oh ni atail kin pein onopki Mahsen en Koht oh doudouloale, kitail kak medemedewe en kalaudehla atail wehwehki uwen kesempwal en rongamwahwo. (Pil. 3:8) Met pahn kamwakid kitail en ngoangki kalohki mahseno!
5. Ia duwen atail kak iang kapwaiada kokohp en Soel?
5 Soukohp Soel kohpada me mwohn sapwellimen Siohwa rahn lapalap oh kamasepwehko eh pahn wiawi, sapwellime aramas akan pahn “kin kohweite” nan doadoahk en kalohk oh sohte mweidohng mehkot en kapweiekiraildi. (Soel 2:2, 7-9) Kitail en wia uwen atail kak koaros en iang pidada doadoahk wet me sohte pahn pwurehng wiawi!